Volejbollisti holandez i plazhit Steven van de Velde, 29 vjeç, i cili u dënua në vitin 2016 për rrëfimin e përdhunimit të një vajze 12-vjeçare, tërhoqi shumë vëmendjen e publikut gjatë performancës së tij në Lojërat Olimpike të Parisit.
Një pjesë të dënimit e kreu në Britaninë e Madhe ku ndodhi krimi dhe një pjesë në Holandë.
Edhe pse u kualifikua për në Lojërat Olimpike, van de Velde u prit me kritika dhe zemërim nga publiku, i cili e shau ashpër gjatë paraqitjes së tij të parë. Ky reagim nuk ishte i papritur, pasi shoqatat për të drejtat e grave kishin nisur një fushatë për ta përjashtuar atë nga gara edhe para fillimit të Lojërave.
Në intervistën e tij të parë pas ndeshjeve, van de Velde pranoi se kishte menduar seriozisht të tërhiqej nga gara në Paris.
“I thashë vetes se ndoshta nuk duhet të shkoj në Paris. Kam bërë një gabim të tmerrshëm dhjetë vjet më parë dhe më duhet të jetoj me të. Por lëndimi i njerëzve rreth meje, si shoku im i skuadrës Matthew, gruaja ime dhe fëmija im, është thjesht shumë dhe më bëri të pyesja: A ia vlen e gjithë kjo? Ju lutem, lëreni të qetë familjen time”, deklaroi van de Velde me lot në sy.
Ndryshe nga sportistët e tjerë, van de Velde nuk ka qëndruar në fshatin olimpik, por në një dhomë hoteli privat, i shoqëruar nga tre truproja.
Pjesëmarrja e tij në Lojërat Olimpike përfundoi pasi holandezët humbën 2:1 nga dyshja italiane Ranghieri dhe Carambula, duke i dhënë lamtumirën mundësisë për të fituar një medalje. /tesheshi.com/
