Dikush e quan “Muri i Madh i Kalesë”, të tjerë e krahasojnë me barrierën që Trump do të donte të ndërtonte në kufirin me Meksikën, të tjerë vazhdojnë të mbështetësin idenë se bëhet fjalë për shpërdorim të parave publike. Ende nuk është vënë tulla e parë e murit që financohet nga qeveria britanike për të ndaluar kalimin e emigrantëve nga Franca, por tashmë kanë nisur polemikat. Në të vërtetë, në një vendim tjetër që ka ndezur debate, edhe qeveria austriake ka njoftuar për “një dekret emergjence” që do të lejonte Vjenën të bllokojë emigrantët në kufij.
Londra ka njoftuar se punimet për murin me çimento të armuar do të nisin këtë muaj dhe do të mund të përfundonin brenda vitit. “Kemi bërë bilancin dhe tashmë mund të ndërtojmë murin”, ka thënë nënsekretari i Emigracionit, Robert Goodwill.
Katër metra i lartë dhe afërsisht një kilometër i gjatë, muri do të shtrihet përgjatë autostradës që kalon në afërsi të “xhunglës”, kampit të emigrantëve në Kale e që shkon deri në port. Sipërfaqja e lëmuar e murit duhet ta bëjë më të vështirë ngjitjen në të. Londra po provon të gjitha mënyrat për të ndaluar emigrantët, që, nga veriu i Francës përpiqen të ngjiten në bordin e kamionëve të drejtuar për në Britaninë e Madhe apo të hidhen në trenat që kalojnë eurotunelin.
Deri më tani, shpjegimi i policisë britanike për ndërhyrjen në territorin francez dhe shtrirjen e kabllove të sigurisë nuk ia kanë arritur të sqarojë situatën. Goodwill ka njoftuar për një shtrirje të masave të sigurisë dhe ka shpjeguar që muri është pjesë e një pakete prej 17 milioë stërlinash apo 20 milionë euro, për të cilën është rënë dakord mes Londrës dhe Parisit marsin e vitit të shkuar.
Situata në Kale ka qenë e trazuar për gjatë gjithë verës, e këtë vit akoma edhe më shumë për shkak të referendumit që i dha fitoren votës Brexit. Kjo e fundit ka qenë e mbushur plot me frikën e emigracionit dhe me dëshirën për mbylljen e kufijve.
Ministrat e brendshëm britanikë dhe francezë kanë zhvilluar ditët e fundit takime në një atmosferë të tensionuar. Rreth 10 mijë persona, pjesa më e madhe të ardhur nga Afrika dhe Lindja e Mesme, jetojnë në kushte të dëshpëruara në kamp, mes tendave të frikshme në mëshirë të fatit. Shumë prej tyre rrezikojnë jetën, e shpesh e humbin atë në përpjekje për të arritur në Dover: 11 të vdekur janë regjistruar vetëm këtë vit, sipas grupit humanitar “Auberge des Migrants”.
Autoritetet e të dyjave vendeve kanë denoncuar përpjekjet e vazhdueshme për të shmangur kontrollet dhe madje, edhe kundërshtimin e policisë, ndërsa kamionistët tregojnë se kanë frikë kur kalojnë në zonë. Të hënën e shkuar, kamionistët dhe fermerët francezë u ngritën në protestë, duke bllokuar autostradën për në Kale e duke kërkuar mbylljen e kampit-xhungël. Parisi ka premtuar të çmontojë përfundimisht kampin, por nuk dihet se kur do ta bëjë këtë gjë në të vërtetë.
Organizatat humanitare e kanë dënuar projektin e murit, por pot ë gjykosh nga reagimet e para ideja nuk po u pëlqen as kamionistëve. Për Richard Burnett, kryetar i shoqatës britanike të transportit në rrugë, do të kishte qenë më mirë të shpenzoheshin 2 milionë stërlina për të rritur masat e sigurisë. Të tjerë truhen se emigrantët që arratisen nga konfliktet dhe varfëria, do të kërkojnë sido që të jetë të kalojnë murin, edhe duke rrezikuar jetën.
Edhe Vjena është vendosur nën akuzë, pasi qeveria ka miratuar një projekt që parashikon ndalimin masiv të kërkesave për azil, e refuzim nga vendet që konsiderohen të sigurta e deri tek 2200 ushtarë që do të dislokohen për të kontrolluar kufijtë e saj. Kancelari Christian Kern ka siguruar që dekreti i emergjencës do të hyjë në fuqi vetëm kur të arrihet limiti i kërkesave për azil prej 37 mijë e 500 të tilla që do të pranohen për këtë vit në Austri.
Masa mund të paditet ndërkaq, nga ana ligjore. Sipas komisionerit të lartë të OKB-së për refugjatët, UNHCR, Christoph Pinter, masa “do të thyente një tabu dhe do të thoshte refuzim të të drejtës së azilit në Austri”. Pinter ka shprehur ndërkaq, frikën se “vende të tjera europiane do të ndjekin këtë shembull”.
Përgatiti: Juli Prifti- /tesheshi.com/
