Për herë të parë, qeveria e Mbretërisë së Bashkuar vendosi sanksione ndaj anëtarit serb të Presidencës boshnjake, Milorad Dodik, si dhe koleges së tij në krye të Republika Srpska, Zeljka Cvijanoviç. Kjo dyshe akuzohet për shkeljen e legjitimitetit dhe funksionalitetit të Bosnjës, tha ambasada aritanike në Sarajevë.
Sanksionet britanike nënkuptojnë se Dodik dhe Cvijanoviç nuk do të jenë në gjendje të udhëtojnë në Britaninë e Madhe, të përdorin ose të kenë akses në asnjë pronë që mund të kenë në Britaninë e Madhe.
“Këta dy politikanë po minojnë qëllimisht paqen e fituar me vështirësi në Bosnje. Të inkurajuar nga Putini, sjellja e tyre e pamatur është një kërcënim për stabilitetin dhe sigurinë në të gjithë Ballkanin Perëndimor. Me këto sanksione të ashpra, ne po tregojmë se armiqtë e paqes do të mbajnë përgjegjësi”, tha në një deklaratë Sekretarja e Jashtme britanike Liz Truss.
“Këto nuk janë sanksione kundër Republikës Srpska, as qytetarëve të saj. Këto sanksione kanë për qëllim dy persona që janë sjellë në mënyrë të papërgjegjshme në pozitat e tyre”, shtoi ajo. /tesheshi.com/
