Siç njoftojnë mediat britanike, një londinez nga periferitë e kryeqytetit është arrestuar nga policia për nxitje të urrejtjes raciale në rrjetet sociale.
Matthew Doyle ka ndeshur një muslimane në rrugë dhe i ka kërkuar asaj t’i japë shpjegime mbi ngjarjet e Brukselit.
“Nuk kanë të bëjnë aspak me mua,” pretendon ai t’i ketë kthyer përgjigje e panjohura muslimane, të cilën mori guximin ta pyesë.
Më tej ai e ka bërë të njohur historinë në rrjetin social Twitter, ku ka shkruar: “Ndesha një muslimane dje në Crojdon (Croydon). I kërkova të shpjegojë Brukselin. Ajo tha, ‘Nuk ka të bëjë aspak me mua.’ Një përgjigje e shtirë.”
Postimi i tij ka marrë dhenë më pas, duke u ripostuar pandërprerë.
Një zëdhënës i Scotland Yard-it ka sqaruar: “Kemi arrestuar një 46-vjeçar me dyshimin e nxitjes së urrejtjes raciale në median sociale.”
I ndaluari nga policia është shfajësuar me pretendimin se nuk e dinte që postimi i tij do të ishte një “granatë dore”. /tesheshi.com/
