Kreu i xhamisë së Finsbury Park kërkoi heqjen e saj nga një listë e zezë terrorizmi, që është konfidenciale e përdoret nga bankat e nivelit të lartë në Britani, duke paralajmëruar se vendosja e xhamisë në këtë listë “demonizon” komunitetit musliman.
Mohammed Kozbar tha se ishte i tronditur dhe i habitur në të njëjtën kohë kur zbuloi se xhamia në veri të Londrës përshkruhej si rrezik terrorizmi në bazën e të dhënave konfidenciale që përdoret nga 49 prej 50 bankave më të mëdha.
Ai e bëri këtë zbulim ndërsa ndiqte një program në radion BBC, ku jepej një dokumentar ku gazetari shpjegonte përse banka HSBC kishte anuluar llogaritë e disa organizatave të rëndësishme muslimane pa shpjegim.
Dokumentari përfundonte duke shpjeguar se xhamia në Finsbury Park së bashku me institutin e sondazheve Cordoba ishin klasifikuar si rrezik për terrorizëm në sistemin e të dhënave, pronë e gjigandit të informacionit financiar, Thomson Reuters.
Xhamia ishte dikur e lidhur me klerikun radikal Abu Hamza në vitet ’90, por për një dekadë pjesëtarët e saj luftuan për ta integruar atë në komunitet.
Kozbar, i cili vetë ka punuar për imazhin e xhamisë, tha se kishte mbetur i habitur kur mësoi se xhamia mbahej si rrezik për terrorizëm dhe nuk i ishte dhënë as e drejta për ta mësuar këtë.
“Kryeministri flet për integrimin dhe angazhimin e muslimanëve në shoqëri dhe kjo është ekzaktësisht ajo që ne duam. Por shihni si ndodh”, tha ai. /tesheshi/
