Një grup grash formuan një zinxhir njerëzor përgjatë urës Westminster në Londër, për të kujtuar viktimat e sulmit më 22 mars. Katër vetë u vranë kur Khalid Masood godoi me automjet disa këmbësorë e më pas qëlloi një polic me thikë, ngjarje e cila tronditi opinionin vendas dhe me gjerë.
Ayesha Malik, një 34-vjeçare, nënë e dy fëmijëve, tha: “Si muslimane mendoj se ishte e rëndësishme për të treguar solidaritet me parimet që i kemi për zemër, të pluralizmit, diversitetit dhe kështu me radhë.”
Dhe katër ditë pas sulmit, ato u mblodhën në solidaritet për të dënuar krimin e tmerrshëm dhe që të tregojnë unitet përballë terrorit.
Sarah Waseem, 57-vjeçare, tha: “Kur ndodh një sulm në Londër, është një sulm mbi mua. Ky është një sulm ndaj të gjithë neve. Islami dënon në tërësi dhunën e çfarëdo lloji. Kjo është e neveritshme për ne”.
Njerëz me origjinë të ndryshme iu bashkangjitën ceremonisë, e organizuar kjo nga Marshi i Grave në Londër. Londinezja Mary Bennett tha se ajo ishte e pranishme për të bërë një “gjest të vogël”. “Unë jam këtu për të treguar se në një mënyrë të qetë ne vazhdojmë të shkojmë ku dëshirojmë dhe bëjmë ashtu si dëshirojmë në Londër. Ky është qyteti im. Është një gjest shumë i vogël, por jeta është e përbërë nga gjeste të vogla”, tha ajo. /tesheshi.com/
