Nga Blendi Gashi
Edhe pse partitë gjatë fushatës zgjedhore janë shprehur optimiste se do fitojnë jo pak komuna që në raundin e parë, pra sot më 22 tetor, një gjë e tillë nuk pritet të ndodh, andaj lufta e madhe për pushtetin komunal pritet të bëhet pas një muaji, në balotazhin e 19 nëntorit.
Gara do mbyllet vetëm sa i kuvendeve komunale, ku do dihen se cila parti sa asamblist ka fituar, kurse 19 nëntori do të qartësojë se cilat pushtete komunale do thyhen.
Ndërsa zgjedhjet e 11 qershorit bën një përmbysje në pushtetin nacional sa i përket se kush është partia e parë, lokalet pritet të mos sjellin rezultate të njëjta në disa komuna.
Pra komunat që i ka fituar një parti e caktuar në parlamentaret e fundit ka gjasa t’i humb në lokalet e sotme dhe anasjelltas.
Më poshtë mund të lexoni se në cilat komuna pritet të ketë rezulate të ndryshme nga ato të 11 qershorit.
Vetëvendosje e Visar Ymerit edhe pse pritet të arrijë rezultate të kënaqshme në këto lokale dhe të marrë nën qeverisje disa komuna, megjithatë nuk pritet të mbajë të gjitha komunat në të cilat doli e para më 11 qershor.
Nuk pritet të fitojë pushtetin në Gjilan, Ferizaj, Han të Elezit, Fushë Kosovë, Vushtrri, e Kaçanik ku doli e para në parlamentare. Ndërsa ka gjasa të mëdha të rifitojë Prishtinën për herë të dytë e për herë të parë të marrë qeverisjen në Kamenicë e Viti.
PDK-ja e Kadri Veselit që fitoi 15 komuna në parlamentaret në koalicion me AAK-në e NISMA-n, ka gjasa të humb pushtetin në Prizren dhe Rahovec, komuna të cilat i qeverisi katër vitet e fundit, kurse bastioni i saj i Skenderajt pritet të udhëhiqet nga i pavaruri Bekim Jashari. Ndërsa mund ta rikthejë në qeverisje Mitrovicën e Ferizajn. Kurse Kaçanikun ka gjasa ta mbajë, edhe pse Vetëvendosje doli e para në parlamentare.
LDK-ja e Isa Mustafës, edhe pse nuk doli e para më 11 qershor, ajo mund të fitojë Prizrenin, Vushtrrinë, e Obiliqin, kurse rrezikon ta humb Pejën e Ferizajn.
AAK-ja e Ramush Haradinajt ka gjasa të humbë Obiliqin kurse mund ta rikthej Pejën e Suharekën.
NISMA e Fatmir Limajt nuk pritet të mposhtet në Malishevë, pra me gjasë do fitojë një mandate tjetër në këtë qytet, ndërsa duhet pritur balotazhin për të parë nëse do të befasojë për të mirë në ndonjë komunë komunë tjetër.
AKR-ja e Behgjet Pacollit e cila ishte në koalicion me LDK-në në parlamentaret e qershorit, gjasat më të mëdha i ka në Mitrovicën e Jugut.
Kurse Alternativa e Mimoza Kusari-Lilës dhe Ilir Dedës, cila poshtu ishte në koalicion me LDK-në, mund befasojë vetëm në Gjakovë, por ka rrezik ta humb këtë komunë. /tesheshi.com/
