Kandidatja e pavarur për kryetar të Shkupit, e mbështetur nga partia opozitare VMRO-DPMNE, Danela Arsovska, shpalli fitoren në raundin e dytë të zgjedhjeve ndaj kandidatit të LSDM-së dhe kryetar aktual Petro Shilegov,.
Në të njëjtën kohë, kryeministri i Maqedonisë së Veriut, Zoran Zaev, në një fjalim para mediave tha se po jep dorëheqje si nga pozita e kreut të qeverisë shtetërore, ashtu edhe nga pozita e liderit të LSDM-së.
Sipas mediave maqedonase, Zaev ka thënë se ka marrë përgjegjësinë e plotë për rezultatet e zgjedhjeve dhe për këtë arsye ka dhënë dorëheqje.
“I përgëzoj të gjithë kryetarët e komunave. Dua të ndaj zhgënjimin si me veten ashtu edhe me njerëzit. Në këto zgjedhje shohim aleanca si të viktimave ashtu edhe të autorëve të 27 prillit. U bashkuan pa fytyrë për vota dhe para”, theksoi ai.
“Unë marr përgjegjësinë për të gjitha rezultatet e këqija. Dhe për rrethana të tilla, mbetem i mendimit që zgjedhjet e parakohshme parlamentare të mos mbahen”.
Në një konferencë për shtyp, Arsovska tha se “Shkupi ka një grua për kryetar komune për herë të parë në 30 vjet të Maqedonisë së pavarur” dhe shtoi se “fitorja është e madhe, me më shumë se 20,000 vota”.
“Tani kemi një shans të ri për të filluar punën që nga dita e parë. Të kërkojmë përgjegjësi për atë që nuk është bërë dhe ta shndërrojmë Shkupin në një qytet të pastër, të gjelbër, të bukur, modern. Një qytet i njerëzve të lumtur”, theksoi ajo.
Në të njëjtën kohë, edhe kandidati i VMRO-DPMNE-së për kryetar të Ohrit, Kiril Peçakov, shpalli fitore në raundin e dytë të zgjedhjeve lokale, në një përballje me Konstantin Georgieskin e LSDM-së. /tesheshi.com/
