‘Lokalet’ e pritshme – A do kalojnë “Çamët” e Idrizit nga e majta?!

“Zgjedhjet lokale” dhe “Tom Doshi”, janë dy çështje të ditës në politikë që po konkurojnë fort me njëra-tjetrën, se cila prej tyre po është më dominante në vëmendjen e medias dhe publikut. Dhe të paktën prej më shumë se një jave, “Doshi” ia ka dalë të jetë mbi interesin se kush do e qeveris vendin në nivel lokal. Kjo u pa dhe mbrëmë, kur në një seri emisionesh politike me në qendër “Doshin”, vetëm njëri kishte “Zgjedhjet”, ai me Shpëtim Idrizin, kreun e PDIU-së e njohur si parti e çemërve.

Ish-deputeti i majtë, që pas zgjedhjeve të 2009 u shkëput nga PS-ja duke krijuar parti më vete dhe duke bërë aleancë me Berishën, i gjendur aktualisht me një këmbë në opozitë e më një tjetër tek mazhorancë, po jep sinjale gjithnjë e më të forta se do kalojë më dy këmbët tek pushteti. Ai ka deklaruar së fundi se synon 5 qarqe, e se për këto pra, është gati për koalicion me të majtën.

Një prej arsyeve se pse PS-ja përjashtoi me aq lehtësi deputetin Tom Doshi, pa merakun e humbjes së një vote, është pikërisht dhe fakti se të tjera mund të ketë “pas dere”, pas një raporti fluid me Idrizin, që daton prej proçesit të krijimit të hartës së re të ndarjes territoriale. Kjo ndarje, pati brenda sa propozimet e Idrizit, por po ashtu dhe votat e tij, që shërbyen si tregues i  konsensualitetit të kërkuar nga ndërkombëtarët në votimin e Reformës së re Territoriale-Administrative.

Idrizi vete, edhe pse i larguar nga PS-ja, nuk e ka ashpërsuar ndonjëherë gjuhën me ish-përtinë e tij. Edhe për faktin se nuk ka patur arsye, derisa dhe nga ish-partia nuk është sulmuar ndonjëherë për braktisjen e saj në funksion të kauzës çame. Përkundrazi, në funksion të një pragmatizmi politik të përzierë me finesë dhe nuhatje politike, ai ka lënë gjithnjë dyer të hapura për bashkëpunim e aleanca në çdo kohë. Siç dhe po ndodh. /tesheshi.com/