Kalimi i sulmuesit kolumbian Jackson Martinez nga Porto tek Atletiko e Madridit ka qenë pa dyshim një ndër transferimet më të bujshme të merkatos të verës së shkuar. Mirëpo, pas vetëm gjashtë muajsh në Madrid, sulmuesi ka ndërruar ambient, duke vendosur të transferohet në Kinë, tek skuadra Guangzhou Evergrande.
Siç raporton mediumi spanjoll Cadena SER, 29-vjeçari do të jetë një tjetër goditje e skuadrës që drejtohet nga braziliani Luis Felipe Scolari pas transferimit të futbollistëve të njohur, si Ramires, Gervinho, apo edhe Paulinho.
Në këtë mënyrë, transferimi më i shtrenjtë i bërë ndonjëherë nga klubi madrilen ka rezultuar një dështim, dhe Jackson Martinez transferohet në kampionatin kinez për shifrën e 45 milionë eurove.
Tani trajneri argjentinas Diego Pablo Simeone do t’i ketë zgjedhjet e limituara në repartin e sulmit, pasi nuk e llogarit shumë as sulmuesin tjetër, Fernando Torres-in, i cili do të lihet i lirë në fund të sezonit. /tesheshi.com/
