Vrapuesi i shpejtësisë nga Xhamajka është futur në histori, duke u bërë atleti i parë që fiton në një garë në tre olimpiada të njëpasnjëshme.
Usain Bolt e kaloi i pari finishin në garën e 100 metrave në Lojërat Olimpike të Rio de Zhanejros. 9.81 sekonda ishte koha e cila iu desh atij për t’i përshkuar të 100 metrat. Ai la pas amerikanin Justin Gatlin, që u rendit i dyti, me 0.08 sekonda më shumë. Medalja e bronzit shkoi për kanadezin Andre de Grasse, që regjistroi kohën e tij më të mirë personale, 9.91 sekonda.
Bolt përsëriti suksesin e tetë viteve më parë në Pekin, si dhe të 2012-tës në Londër.
Kjo ishte medalja e shtatë e artë e Usain Bolt-it në olimpiada, ndërkohë që ai shpreson të marrë dhe dy të tjera, në garën e 200 metrave, si dhe në stafetën 4×100 metra.
“Nuk ishte një ditë e përsosur… Shpresoja të isha më i shpejtë, por jam i lumtur që fitova. Jam shumë krenar për çfarë kam arritur; askush tjetër nuk e ka bërë këtë, apo madje të përpiqet ta bëjë,” është shprehur fituesi i medaljes së artë në 100 metra.
Atleti që përfaqëson Xhamajkën synon ta çojë në nëntë numrin e medaljeve të arta të fituara, duke kërkuar të fitojë dhe në dy garat e tjera. Me këtë ai do të plotësonte një sukses të trefishtë në tre olimpiada, në Pekin 2008, në Londër 2012 dhe në Rio 2016. /tesheshi.com/
