Pas paraqitjes dinjitoze në tre ndeshjet e zhvilluara në Francë dhe pas fitores së fundit ndaj Rumanisë, qeveria shqiptare ka vendosur të shpërblejë futbollistët e kombëtares shqiptare të futbollit.
Vendimi është publikuar sot nga Këshilli i Ministrave dhe në të thuhet se kombëtarja do të shpërblehet me 1 milion euro.
Më herët ka qenë vetë Kryeministri Edi Rama ai që ka bërë me dije përmes një videoje të postuar në profilin e tij zyrtar në rrjetin social Facebook se të gjithë anëtarët e ekipit të kombëtares së futbollit do të pajisen me pasaporta diplomatike.
Vendimi i qeverisë:
Vendim për një shtesë fondi në buxhetin e vitit 2016, miratuar për ministrinë e arsimit dhe sportit, për shpërblimine ekipit kombëtar të futbollit.
Në mbështetje të nenit 100 të Kushtetutës, të neneve 5 e 45, të ligjit nr.9936, datë 26.6.2008, “Për menaxhimin e sistemit buxhetor në Republikën e Shqipërisë”, të ndryshuar, dhe të nenit 13, të ligjit nr.147/2015, “Për buxhetin e vitit 2016”, me propozimin e ministrit të Financave, Këshilli i Ministrave
Vendosi:
Ministrisë së Arsimit dhe Sportit, në buxhetin e miratuar për vitin 2016, zëri “Shpenzime korente”, t’i shtohet fondi prej 1 000 000 (një milion) eurosh, për shpërblimin e Ekipit Kombëtar të Futbollit. Kundërvlefta në lekë e këtij fondi t’i akordohet në formën e transfertës Federatës Shqiptare të Futbollit për t’u përdorur sipas pikës 1, të këtij vendimi.
Efektet financiare sipas pikës 1 të përballohen nga fondi rezervë i buxhetit të shtetit, miratuar për vitin 2016. Ngarkohen Ministria e Arsimit dhe Sportit dhe Ministria e Financave për zbatimin e këtij vendimi. Ky vendim hyn në fuqi menjëherë dhe botohet në “Fletoren zyrtare”. /tesheshi.com/
