Në të parën vizitë të përfaqësueses portugeze në Wembley që nga viti 1998, anglezët arritën të fitojnë ngushtësisht në miqësoren e së enjtes, e fundit në serinë e përgatitjeve për në Euro 2016.
Anglia vuajti shumë ndaj një Portugalie të vendosur mirë në fushë, por gjithsesi pa Ronaldo-n, e njëkohësisht me një lojtar më pak që nga minuta e 35-të.
Ajo ndërhyrje e çmendur e Bruno Alves-it ndaj Harry Kane-it do të kthehej në kartolinën e miqësores së mbrëmshme, pasi pak gjëra të tjera interesante pati gjatë lojës. Alves do të nxirrej jashtë me të kuqe, por kjo nuk do ta lëkundte aspak mbrojtjen portugeze, e aftë të rezistojë gjer në minutat e fundit.
Ndërsa i mungoi intensiteti në pjesën e parë të takimit, Anglia vuajti dhe pasi kundërshtari mbeti me një
lojtar më pak. Rastet munguan, kurse Rooney, i vendosur në treshen sulmuese pas Vardy-t dhe Kane-it, qe tërësisht zhgënjyes. Kyle Walker qe i vetmi që mundi të spikaste me lojën e tij, dhe ngjan ta ketë zënë vendin në formacionin anglez si mbrojtës i djathtë.
Nderin e përfaqësueses së Anglisë e shpëtoi Chris Smalling, që shënoi në minutën e 86-të. Fitorja 1-0 më shumë mori kritika se lavdërime, teksa Anglia u jep fund ndeshjeve përgatitore.
E gjendur në grupin B të Euro 2016-ës, Anglia do ta luajë takimin e parë në këtë aktivitet më 11 qershor, ndaj Rusisë. /tesheshi.com/
