KQZ vendosi sot që të hapë kutitë e votimit për një rinumërim që do të përcaktojë dhe mandatin e fundit për Tiranën.
Beteja zhvillohet mes PDIU-së dhe PS-së, por me shumë gjasa kutitë do të vërtetojnë dyshimet për tjetërsim vote.
Për rezultatin final të zgjedhjeve në Tiranë ka dy ankesa nga PDIU dhe nga Partia Socialiste. PDIU akuzon se komisionerët e dy partive të mëdha i kanë vjedhur votat gjatë numërimit dhe për ta provuar këtë ka publikuar video ku shihen votat e kësja partie që kalojnë në grumbullin e votave të partive të tjera.
Por, nga ana tjetër edhe Partia Socialiste ka bërë një ankesë në KQZ ku pretendon se PDIU ka përvetësuar votat që nuk janë të saj.
Kjo kërkesë ka hedhur hije dyshimi se gjatë numërimit në Tiranë mund të jetë bërë një lojë antiligjore me votat e kësaj partie, i janë dhënë vota që s’janë të sajat dhe më pas votat e saj i kanë kaluar PS-së.
Kur PDIU-ja e Shpëtim Idrizit ishte në avantazh, komisionerët socialistë e kanë ndihmuar me vota shtesë në përpjekje për t’i marrë mandatin e pestë LSI-së, por kur kanë parë se situata po shkonte që mandati i Idrizit do të penalizonte vetë PS-në, atëherë votat e PDIU-së i kanë kaluar kësaj partie.
Nëse vërtetohet kjo atëherë do të jetë një skandal i madh zgjedhor.
Gazeta Mapo shkruan sot se socialistët pretendojnë se nga verifikimi i pamjeve filmike të 9 kutive, por edhe nga vlerësimet e bëra nga vëzhguesit, PDIU-së i janë shënuar më shumë vota se sa ka marrë realisht.
PS-ja i ka specifikuar kutitë e votimit ku bazohet ankesa e saj duke hedhur dyshime se ata e dijnë saktësisht në cilat kuti janë hedhur vota të pameritura për PDIU-në
PS pretendon se PDIU-së në vetëm këto 9 qendra votimi i janë dhënë në mënyrë të padrejtë më shumë se 40 vota më shumë sesa ka pasur realisht.
Burime nga PS i kanë thënë kësaj gazete se “ka pasur një lloj orientimi të numëruesve për të favorizuar PDIU-në që kjo t’i merrte mandatin e pestë LSI-së. Por në momentin që LSI e siguroi mandatin e pestë në Tiranë dhe PDIU ishte shumë afër marrjes së mandatit që i përkiste PS-së, atëherë direktiva ndryshoi dhe numëruesit e PS nisën të kompensonin lëshimet që i kishin bërë PDIU-së në fillim”./tesheshi.com/
