Reforma në Drejtësi është akoma në fazën e ngritjes së institucioneve të saj të reja, që të pritet të bëjnë dhe spastrimin e sistemit të drejtësisë nga gjyqtarët e prokurorët e korruptuar. Por derisa kjo reformë të nisë të japë rezultatet e para të saj, sistemi ka nisur të veprojë me masat mbrojtëse, të tipit “çfarë është për t’u bërë të bëhet tani, pasi kur të nis vettingu s’ka më mundësi”.
Me shpresën se Vettingu s’do të ketë efekt prapaveprues, gjykatat në gjithë vendin po marrin vendime të diskutueshme për nxjerrjen nga burgu të burgosurve VIP apo me dënime të larta, duke kryer në këtë mënyrën dhe “masakrën” e fundit mbi drejtësinë.
Rasti tipik i këtij nxitimi për t’i larë hesapet para se të nisë era e re në drejtësi, është lirimi i Lulzim Berishës i dënuar me burgim të përjetshëm, më pas me 25 vite burg, dhe së fundmi i lirë në rrugët e Durrësit pas vetëm 10 vitesh burgim. Lirimi i tij shkaktoi bujë në media, pasi nga Berisha ishte i akuzuar dhe dënuar për krime të rënda, që nga trafiku ndërkombëtar i drogës, krim i organizuar dhe vrasje.
Po duket se lirimi i të “fortit të Durrësit”, ku u përfshi dhe Bashkia e këtij qyteti e cila i ofronte punë pas daljes nga burgu, është vetëm maja e ajsbergut të asaj çfarë po ndodh këto kohë në gjykatat e tjera në të gjithë vendin.
“Mund të konsiderohet një hapje e dyrve të burgut për ata që kanë para dhe njohjet e duhura për të dalë sa më shpejt prej aty, pavarësisht dënimeve që kanë marrë- i tha një burim nga Gjykata e Tiranës, tesheshi.com.
Bëhet fjalë për shumë vendime që për fat të keq janë larg syve të mediave, për të cilën përbën lajm vetëm kur ka arrestime të bujshme nga policia, por që nuk arrin të ndjekë vendimet e gjykatave të cilat nën lojën juridike me ligjet dhe nën presionin e kohës dhe të parasë, po krijojnë një aministi të ngjashme me atë të vitit 1997, kur të burgosurit dolën nga burgjet pavarësisht krimeve që kishin kryer dhe dënimeve që kishin marrë.
Frika nga Vettingu
Që Shqipëria ka një sistem të kalbur drejtësie, ku merr “drejtësi” vetëm ai që ka para dhe njohjet e duhura, kjo dihet; për këtë ulëret kryeministri i vendit çdo ditë. Por zvarritja e zbatimit të Reformës në Drejtësi, e cila u votua në korrik të vitit 2016 dhe vijon të jetë akoma në fazën e ngritjes së institucioneve, u ka dhënë kohën e duhur të gjithë gjyqtarëve që të bëjnë “milionat” e fundit, nga frika se në të ardhmen do të duhet të jenë të kujdesshëm.
Në këtë mënyrë shumë dosje me dënime të rënda që kanë mbetur zvarrë nëpër dyert e gjykatave për vite, po marrin si me “magji” zgjidhje duke zbrazur burgjet nga “të fortët”.
Mjafton të shohim dosjen e Lul Berishës për të kuptuar si avokatë, psikologë, gjyqtarë e prokurorë bëhen pjesë e një skeme, ku përfitohet nga çdo hapësirë ligjore në favor të hapjes së rrugës për të dënuarin.
Gjyqtarët kanë dalë edhe hapur kundër Vettingut duke e ankimuar ligjin në Gjykatë Kushtetuese, pikërisht ditën kur parlamenti u mblodh pas një marrëveshje politike historike për të votuar nisjen nga puna të Vettingut.
Në qershor, Shoqata Kombëtare e Gjyqtarëve dhe Unioni i Gjyqtarëve të Shqipërisë paditën në kushtetuese ligjet e Reformës në Drejtësi.
Kjo ishte përpjekja e dytë e tyre pasi më parë lobi i gjyqtarëve iu bashkua kërkesës së PD-së në fund të vitit 2016 për të rrëzuar ligjin e Vettingut.
Beteja që po zhvillohet në prapaskenën e premtimeve për një reformë rrënjësore në drejtësi po i zgjat agoninë këtij sistemi që kemi. Gjyqtarët, “të dënuarit” e reformës, po e luajnë lojën e tyre sa janë akoma në kohë para se fshesa të bjerë mbi ta, ndoshta dhe me shpresën se kjo fshesë nuk do t’i prekë.
Vettingu pritet që t’i vendosë në sitë gjyqtarët në bazë të tre kritereve kryesore: vlerësimi profesional, evidentimi i pasurisë së paligjshme dhe lidhjet e tyre me krimin e organizuar.
Deri sa t’u vijë rradha për të dalë vetë para drejtësisë, ata po e përdorin drejtësinë siç e kanë përdorur deri më sot: për t’u pasuruar. /tesheshi.com/
