Në mediat e huaja prej muajsh flitet për lojën “Balena blu”, e cila kërcënon fëmijët dhe adoleshentët. Loja është një sfidë sjelljesh që një tutor ia imponon lojëtarëve deri në sfidën e fundit ku kërkohet vetvrasja e atyre që e luajnë.
Besohet se dhe në Shqipëri kjo lojë luhet nga adoleshentët. Rasti i vetëm i bërë publik është ai i një vajze 12-vjeçare nga Gjirokastra, e cila kërkoi ndihmë tek shoqet dhe mësuesja.
Por loja, e cila e pompuar nga mediat ka krijuar kuriozitet ndër të rinjtë, ka nisur të përhapet frikshëm me sa duket, aq sa është bërë edhe shqetësim në një famullti në Shkodër.
Nga mesha e shenjtë në katedralen e “Shën Shtjefnit” ku bëri kungimin e 70 fëmijeve, famullitari i Shkodrës dom Artur Jaku zgjodhi që të fliste për këtë lojë dhe kërkoi kujdesin maksimal të prindërve, shkollës dhe institucioneve të tjera ndaj fëmijëve.
Jaku tha se vetë ai ishte njohur me të paktën 3 raste fëmijësh që e luajnë këtë lojë.
“Vetëm sot kam pas disa raste prej fëmijëve që frekuentojnë kishën ku një prej tyre më ka thënë që dom Artur, motra ime e ka prerë dorën këtu që të bëjë shenjën e balenës, duke rrezikuar me pre dhe damarët. “Më besoni nëse i shihni fëmijët tuaj se janë të mërzitur. Simpomat janë: Shumë herë të mërzitur, ngrihen natën, dalin nga shtëpia, nuk shkojnë në shkollë, nuk hanë ushqim se kështu funksionon loja dhe deri sa i çojnë me u hedh prej apartamenteve, prej lartësive të ndryshme deri sa i çojnë në vetëvrasje.Është hapur në mënyrë të fuqishme, kujdes!” – u shpreh famulltari, raporton Ora news.
“Bota e internetit, duke qenë e pakufijshme është edhe e pakontrollueshme. Nuk e dimë se çfarë gjendet aty’- ishte mesazhi i Jakut për besimtarët.
Po çfarë është kjo lojë dhe a ka vend për panik
Loja e ka marrë emrin nga nga fenomeni i balenave blu, të cilat dalin në brigjet e oqeaneve dhe ngordhin pasi humbasin rrugën. Në Rusi mendohet se më shumë se 150 adoleshentë kanë vrarë veten dhe policia ka arritur të arrestojë krijuesin e kësaj loje.
Ajo nuk është një lojë e programuar, por luhet nëpërmjet kontaktit direkt nëpërmjet rrjeteve sociale, kryesisht facebook-ut, mes tutorit dhe viktimës, pra lojëtarit, ku tutori i jep direksione se si t’a luajë duke u bërë edhe udhëheqësi drejt sfidës finale që kërkon flijimin.
Pra është një lloj trilli psikologjik.
Në Europë është përhapur tashmë paniku tek prindërit dhe fëmijët. Por roli i medias në këtë rast mund të ketë ndikuar më shumë për keq se sa për mirë, pasi ka bërë kuriozë adoleshentët dhe të rinjtë që të shkojnë drejt kësaj loje.
Dëshmitarë që e luajnë këtë lojë kanë pohuar se e kanë nisur lojën duke u ndikuar nga media, nga postime apo foto të pafiltruara online.
Gjithsesi kujdesi nuk është kurrë i terpërt.
Sidomos prindërit duhet të mbajnë sytë hapur dhe të shikojnë ndryshimet në sjellje të fëmijëve të tyre.
Shkolla gjithashtu ka rolin e saj në edukimin dhe sensibilizimin e të rinjve për rreziqet e kësaj loje./tesheshi.com/
