Çifti bashkëshortor Senad Kapiç, 30-vjeçar dhe Enesa Kapiç 26-vjeçare, nga Cazin i Bosnjës, janë autorë të idesë së lodrave didaktike të punuara nga materiale natyrore dhe ekologjikisht miqësore. Senad është inxhinier i industrisë së drurit, ndërsa Enesa është profesore e fesë islame. Mirëpo pasi u gjendën të papunë të dy për një çast, nisën të mendojnë për hapjes e një linje prej së cilës do proshoheshin lodra didaktike.
Çifti shpjegon funksionin dhe kuptimin e lodrave edukative, të cilat luajnë një rol të rëndësishëm në zhvillimin e aftësive njohëse të fëmijëve.
“Lodrat didaktike janë, mbi të gjitha, lodra edukative, lodra me ndihmën e të cilave fëmija mëson, përmirëson aftësinë e proceseve të mendimit dhe atyre fizike, zhvillon koordinimin në mes të lëvizjeve të dorës dhe syve, ndihmon në të mësuarit e ngjyrave, numrave, shkronjave dhe formave gjeometrike, dhe të gjitha këto përmes asaj që fëmijët e duan më së tepërmi, e ajo është argëtimi dhe lojërat”, shpjegon Enesi.
Përparësia më e madhe e prodhimit të tyre është se ato punohen nga materiale natyrore. Se sa e rëndësishme është kjo dhe cilat janë avantazhet e lodrave të krijuara në këtë mënyrë, Senad thotë se krahas drurit, si materiale për ngjyrosjen e lodrave janë përdorur ngjyra jo-toksike të cilat nuk janë të dëmshme për organizmin e fëmijës, dhe kjo është nga ana tjetër përparësi e madhe në krahasim me lodrat e tjera.
“Përveç faktit se produktet tona janë edukative, një përparësi e madhe është edhe fakti se ne përdorim një material natyror, e ai është druri, si dhe ngjyra uji jo-toksike. Përveç kësaj, në procesin e punimit të lodrave dhe dizajnit të tyre, është investuar shumë përkushtim dhe dashuri, që e bën këtë produkt të veçantë. Ne përpiqemi që secili prej produkteve tona të jetë i sigurt për të gjithë përdoruesit, pa tehe të mprehta dhe pjesë të vogla. Pra, lodra janë të sigurta”, thotë Senadi.
Vetë procesi i prodhimit përbëhet nga 6 faza, dhe pjesa më e madhe e vëmendjes i kushtohet paketimit të produkteve, ku Senad dhe Enesa kanë dizajnuar dy lloje paketimi.
“Gjatë periudhës së hulumtimit të tregut, kemi vizituar shumë institucione arsimore dhe kemi kuptuar se ato janë të dominuara kryesisht nga lodra të punuara prej plastike, andaj edhe interesimi për lodra prej druri ka tërhequr pikërisht vëmendjen e administratës së këtyre institucioneve. Qasja në lodrat me cilësi të lartë prej druri dhe material didaktik nuk është në dispozicion për momentin, prandaj edhe shumica e institucioneve janë përcaktuar për material plastik. Ne shpresojmë që linja jonë do t’u ndihmojë të gjithë shfrytëzuesve qasjen më të lehtë deri tek produktet vendore cilësore dhe edukative. Çdo ditë e më shumë njerëz kanë filluar të njohin cilësinë e produkteve tona”, thotë Enesi.
Senad dhe Enesa nuk janë të orientuar vetëm në tregun e brendshëm, por po mendojnë në atë drejtim që produktin e tyre ta eksportojnë në Bashkimin Evropian, dhe përmes miqve të tyre ata tashmë janë duke u përpjekur për të krijuar një bashkëpunim me diasporën e Bosnjes si klientë potencialë të parë jashtë kufijve të vendit.
“Tashmë ka interes në tregun e BE-së, por ne kemi nevojë për investime shtesë në prodhimin aktual për të përmbushur kërkesat”, thotë Senadi i cili realizon në dru idetë e gruas së tij Enesa. /tesheshi.com/
