Ministri i Rendit Sandër Lleshaj e pranoi me gojën plot duke thënë se “krimi ka lëshuar rrënjë në Shkodër”. Ai ishte në qytetin verior për të prezantuar prefektin e ri Valdrin Pjetri, por dhe një plan masash, për goditjen e krimit, ku apeloi që dhe qytetarët të kontribuojnë.
“Ftoj qytetarët që të bëhen palë dhe të gjithë së bashku të sfidojmë krimin”, tha Lleshaj.
Siç tha kreu i Rendit, “niveli i sigurisë është sfiduar disa herë. Ato janë produkt i krimit të organizuar në vite. Krimi ka arritur të lëshojë rrënjë në Shkodër. Me gjithë goditjet e mëdha sërish ngelet një sfidë shumë e madhe”.
Edhe njëherë, Lleshaj shprehu bindjen se me Niko Brahimajn si kreu i ri i Policisë së Shkodrës, situata do ndryshojë.
“Besoj që me drejtorin e ri dhe përforcimet që do të vijnë do të arrijnë të godasin fort krimin”, tha ministri Lleshaj. /tesheshi.com/
