Llalla thërret Saimir Tahirin në Prokurori për Shullazin

Pak ditë pasi ka lënë postin e ministrit të Brendshëm, Saimir Tahiri është thirrur menjëherë në prourori.

Adriatik Llalla, i cili u fol që e kishte bërë gati fletën e arrestit për ministrin e Rendit për çështjen e përgjimeve, i nxitur nga Ilir Meta, këtë herë i ka dërguar mandatin Tahirit që nuk ka mandat, tashmë për çështjen “Shullazi”.

Siç bën të ditur Prouroria e Krimeve të Rënda, Tahiri është thirrur në cilësinë e deklaruesit për kërcënimin që i është bërë rektorit të Tiranës, Munir Koni ku ky i fundit ishte vetëm kandidat e Dhori Kule ishte rektor.

Dy rektorët, që dyshohet se janë kërcënuar nga Emiljano Shullazi në prill 2016, kur mbahej fushata për zgjedhjet në universitete, në dëshminë e tyre kanë përmendur Tahirin.

Ata kanë thënë se pasi u kanosën nga persona të panjohur para një hoteli në Tiranë, kanë marrë kontakt me drejtorin e Policisë së Tiranës, Ervin Hodaj. Ky i fundit, bashkë me dy rektorët, kanë shkuar atë ditë në zyrën e ministrit të Brendshëm, Saimir Tahiri, i cili ka mësuar ngjarjen dhe u ka premtuar rektorëve se Policia do të bënte gjithçka për identifikimin dhe kapjen e autorëve.

Saktësimi i këtyre rrethanave është bërë shkak për fletëthirrjen dërguar Tahirit.

Javën e kaluar në prokurori është pyetur drejtori i Policisë së Tiranës, Ervin Hodaj. Përveç deklarimeve të marra në lidhje me procedurën e ndjekur nga Policia në mesin e muajit prill 2016, kur është bërë shoqërimi i Emiljano Shullazit, burimet e Policisë kanë thënë se drejtori i Policisë së kryeqytetit është pyetur edhe për komunikimet e tij me eprorët dhe me vartësit ditën e ngjarjes. /tesheshi.com/