U duk se skuadra e Jurgen Klopp-it po linte pikët e para pas disa javësh, teksa Suonsi Siti bëri një pjesë të parë mjaft të mirë ndaj Liverpulit në “Liberty Stadium”.
Liverpuli u tregua i thyeshëm në 45 minutat e para ndaj Suonsi Sitit. Vendasit kaluan në epërsi që në minutën e 8-të, kur shënoi Fer.
Pjesa e dytë ishte gjithçka tjetër, me një dominim të plotë të miqve, që u shpërblyen për atë çka dhanë në fushë.
Fillimisht barazoi Firmino nëntë minuta pas nisjes së kësaj pjese, për të ardhur tek goli i Milner-it me 11-metërsh në minutën e 84-t.
Fitorja 1-2 e ka ngjitur Liverpulin përkohësisht në vend të dytë në renditjen e kampionatit anglez. Katër fitore radhazi për Liverpulin, që po tregon se është një nga skuadrat më në formë në Angli.
Suonsi Siti, në anën tjetër, mbetet në pozitë të vështirë, me vetëm një fitore në shtatë javë. Të lëkundura janë dhe pozitat e teknikut italian, Guidolin-it. /tesheshi.com/
