U kujtohet finalja e Champions League-s e fundmajit të 2005-ës, kur Milani kryesonte 3-0 pas vetëm 45 minutave? Një kthim i pabesueshëm i lojës në gjashtë minuta, nga e 54-ta në të 60-ën, dhe tre gola të njëpasnjëshëm, të shënuar nga Gerrard, Smicer dhe Alonso, bënë që Liverpuli të barazonte e të fitonte në fund me 11-metërsha.
Dhe historia përsëritet sërish, me një tjetër kundërshtar, në një tjetër aktivitet, e jo në finale. Veçse është e paimagjinueshme. Vetëm një skuadër e tillë mund ta kthejë të tillë rezultat!
Ndaj Borusias shumë më teknike, më cilësore dhe më të qartë, lojtarët e Liverpulit vunë zemrën dhe shpirtin e tyre, duke mos u dorëzuar për asnjë çast, e duke qeshur ata të fundit.
Çerekfinalja e dytë e Ligës së Europës mes Liverpulit dhe Borusias së Dortmundit do të mbetet gjatë në mendje.
Me takimin e parë në Gjermani të mbyllur 1-1, gjithçka qe lënë e hapur për në Angli. Në “Anfield”-in që
nuk pushoi për asnjë çast nga koret mbështetëse të të dyja skuadrave, Borusia e nisi tepër vrullshëm, duke kryesuar 0-2 në minutën e nëntë. Mkhitaryan dhe Aubameyang përveçse shënuan, patën dhe raste të tjera për t’i thelluar shifrat.
“Krijoni një moment që t’ua tregoni fëmijëve e nipave,” u ka thënë Jurgen Klopp lojtarëve të Liverpulit në pushimin e mesndeshjes. Dhe Origi shkurton diferencën pak pas nisjes së pjesës së dytë. Por nuk qe e thënë që gjërat të vijonin për mbarë, ndërsa Reus e çon rezultatin në 1-3 me një kundërsulm klasik të Borusias.
Të tulatur, vendasit sillen rrotull në fushë pa asnjë ide, gjersa në minutën e 66-të vjen goli i Coutinho-s. Këtu besimi se fitorja është e mundshme nis e merr krahë. Për të ardhur te minuta e 77-të, kur Sakho barazon me një goditje me kokë. 3-3!
Lojtarët e Liverpulit nuk krijojnë pas kësaj asnjë rast thuajse gjer në fund të lojës, kur edhe vjen çasti fatlum. Eshtë minuta e 91-të. Milner dërgon topin në zonën e rreptësisë së Borusias, dhe Lovren kërcen fuqishëm me kokë. 4-3 për Borusian!
Përmbysja u arrit! Liverpuli në gjysmëfinale, ndërsa Borusia kthehet në shtëpi e ndëshkuar nga ish-trajneri i saj, Jurgen Klopp.
Gjysmëfinalistët e tjerë janë Shakhtar i Donjeckut, Vilareali dhe Sevilja.
Shakhtari e fitoi dhe takimin e dytë ndaj portugezëve të Sporting Bragës. Rezultati 4-0 nuk la vend për mëdyshje për fituesin.
Vilareali po ashtu fitoi dhe në sfidën e kthimit në Çeki ndaj Spartës së Pragës. Fitores 2-1 në ndeshjen e parë iu bashkangjit rezultati 2-4 për Vilarealin dhe në 90 minutat e dyta.
Një dramë më vete qe përballja e tëra spanjolle. Teksa Sevilja e kishte mposhtur 1-2 Atletik Bilbaon në transfertë, të njëjtën gjë bënë baskët mbrëmë në stadiumin “Ramon Sanchez Pizjuan”. Ndeshja shkoi në shtesa, e më tej akoma, te 11-metërshat. Ku mbajtësit e trofeut, lojtarët e Seviljes, u treguan më të saktë. 5-4 përfundojnë penalltitë, pasi Benat gabon për miqtë. Sevilja vijon rrugëtimin në kërkim sërish të fitimit të Ligës së Europës.
Çiftet gjysmëfinaliste do të mësohen sot në mesditë, kur edhe do të hidhet shorti. /tesheshi.com/
