Liverpuli ka triumfuar ndaj Evertonit, në të parin takim të javës së 30-të të kampionatit anglez. Ndeshja është fituar 3-1, me një zotërim të plotë të Liverpulit në pjesën e dytë, posaçërisht pas golit të tretë.
Ky është rezultati i katërt radhazi pozitiv për Liverpulin, që shkon në kuotën e 59 pikëve me këtë fitore, aq sa ka dhe Totenhemi i vendit të dytë.
Rrjeta është tundur shpejt në këtë përballje, që në minutën e 8-të, kur do të shënonte Mane për Liverpulin. Vetëm njëzet minuta më vonë do të vinte barazimi për miqtë, pas golit të Pennington-it. Në të 31-tën minutë do të ishte Coutinho që do t’u jepte sërish epërsinë vendasve.
Evertoni do të kishte mundësi për t’i barazuar shifrat në fillim të pjesës së dytë, kur dhe do të ushtronte presion. Goli i tretë i Liverpulit, shënuar nga Origi në minutën e 60-të, pak pas futjes së tij në lojë në vend të Mane-s së dëmtuar, u dha fund përpjekjeve të miqve, të dorëzuar tashmë.
Në fund mund të thuhet se ishte një derbi tërheqës. Jurgen Klopp bëhet i pari trajner i Liverpulit që i fiton tre ndeshjet e para të derbit të Merseyside-t në kampionat.
Merseyside ka ngjyrë të kuqe dhe njëherë tjetër, shkruan BBC-ja. Pritja e gjatë e Evertonit për një fitore në “Anfield” vazhdon… /tesheshi.com/
