Në tre finale të njëpasnjëshme të Champions League-s, nga 2016-ta e këtej, fituesi është i njëjti, e humbësit janë të ndryshëm.
Atletiko e Madridit, Juventusi dhe Liverpuli e kanë patur të pamundur të mundin Realin e Madridit, skuadrën më të mirë të Champions League-s.
Mbrëmja e Kievit ka qenë dramatike për Liverpulin. Ka humbur Salah-un në pjesën e parë, pas një dëmtimi të shpatullës, dhe, si të mos mjaftonte kjo, Karius, portieri gjerman, ka bërë dy gabime fatale, shndërruar në gol.
Reali e ka nisur lojën me të njëjtin formacion të finales së sezonit të kaluar. Një pjesë e parë me rezultat të pandryshur është pasuar nga një e dytë me katër gola.
Karius gabon, Benzema shënon në të 51-tën minutë. Mane kthen ekuilibrin katër minuta më vonë. Bale bën një akrobaci në minutën e 64-t, shpërblyer me tundje rrjete. Uellsiani provon shtatë minuta para mbarimit të lojës dhe nga larg. Një tentativë e suksesshme, teksa Karius i jep një tjetër goditje karrierës së tij me një tjetër budallallëk.
Reali fiton 3-1, shpërthen në gëzim! Vetëm lot për Liverpulin, që në 90 minuta nuk bëri kurrë lojën e tij mbresëlënëse! Ky është futbolli! /tesheshi.com/
