Antonio Conte, ish-trajneri i Juventusit dhe i përfaqësueses italiane, nuk humbiste një ndeshje kampionati si pritës, në drejtim të një ekipi, që prej janarit të vitit 2013!
Një ecuri pozitive prej 30 takimesh e ndërprerë në mes nga Liverpuli i Jurgen Klopp-it. Një betejë shkollash futbolli, e fituar më së paku mbrëmë nga gjermani.
Çelsi pësoi humbjen e parë në sezonin e ri të kampionatit anglez. Me një fillim të rrufeshëm në gusht, skuadra londineze ka nisur dalëngadalë të lëshojë terren, që prej barazimit të së dielës së shkuar me Suonsi Sitin.
Ndërkohë që për Liverpulin, kurba e paraqitjeve është në ngjitje. Fitorja ndaj Çelsit pason atë të një jave më parë ndaj Lestër Sitit.
Rezultati final i përballjes së mbrëmshme mes Çelsit dhe Liverpulit në “Stamford Bridge” qe 1-2.
Një fitore e merituar për Liverpulin, që në tridhjetë minutat e para ka luajtur veçanërisht mirë. Ka kontrolluar gjithçka në këtë pjesë të lojës, e për më tepër, me një futboll mjaft logjik e të këndshëm.
Lovren i ka dhënë epërsinë Liverpulit në minutën e 17-të, pas një konkretizimi të mrekullueshëm të një krosimi nga e majta e sulmit.
Goli i dytë është krejt gjë tjetër. Spektakolar ka qenë Henderson me atë gjuajtje në minutën e 36-të. Topi i goditur prej tij jashtë zonës ka përfunduar në këndin ku bashkohen dy shtyllat e portës; Courtois u hodh shkëlqyeshëm, por topi nuk mund të pritej!
Vetëm pas kësaj Çelsi u kujtua të luajë, duke u imponuar në momente të veçanta të pjesës së dytë. Diego Costa dha shpresë me golin e tij të minutës së 61-të, por barazimi nuk erdhi kurrë. Madje ishte portieri belg që e shpëtoi nga fundi ekipin e tij nga pësimi i një tjetër goli të sigurt.
Humbja e ka vënë në vështirësi Antonio Conte-n, që u ka kujtuar lojtarëve të tij pas ndeshjes se nuk e dëshiron aspak një përsëritje të sezonit të shkuar. Mbrojtja veçanërisht ka shfaqur probleme, duke treguar se Terry, kapiteni veteran, është ende i pazëvendësueshëm, pavarësisht moshës së tij.
“Dua të punoj më shumë për t’i përmirësuar lojtarët e mi. Humbjet nuk janë kurrë të mira. E dimë këtë; duhet të punojmë dhe të ruajmë përqendrimin,” ka deklaruar Conte.
Jurgen Klopp, në të kundërt, do të shprehte me të drejtë tërë kënaqësinë e tij, “Ishte sigurisht një fitore e kënaqshme. Qe vërtet bukur të shikoje. Në pjesën e dytë ishte paksa më e vështirë. Ia dolëm mirë pas golit të tyre.” /tesheshi.com/
