Fitorja e djeshme e Liverpulit ndaj Barcelonës është mbase më spikatësja dhe më domethënësja e takimeve të shumta përgatitore para sezonit të ri. E para, sepse qe e thellë, e pikërisht ndaj Barcelonës, dhe e dyta, sepse vjen një javë para nisjes së Premier League-s, duke u dërguar një sinjal të fortë rivalëve në kampionatin anglez.
“Wembley” do të mbushej plot në orët e pasdites të së shtunës, me 89.945 shikues që ishin të paduruar për të parë përplasjen mes Liverpulit dhe Barcelonës, të vlefshme për Kupën Ndërkombëtare të Kampionëve.
Skuadra e Jurgen Klopp-it bëri një paraqitje të jashtëzakonshme, me një fitore të thellë, 4-0. Sadio Mane, blerja e re e Liverpulit, shënoi dhe golin e parë të ndeshjes.
Lionel Messi dhe Luis Suarez, dyshja brilante e Barcelonës, e pati të vështirë të bënte gjëra të bukura në një takim ku gjithçka foli për Liverpulin.
Rezultati i përballjes do të thellohej nga një autogol fatkeq i Mascherano-s me nisjen e pjesës së dytë, të pasuar në minutën e 48-të nga goli i Origi-t.
Gjithçka do të merrte fund në minutën e 93-të, kur Grujic do t’i çonte shifrat në 4-0 për Liverpulin.
Një fitore e pastër, që i jep Liverpulit të Jurgen Klopp-it një rol protagonisti në prag të nisjes së sezonit futbollistik.
Një javë më pas, të dielën e 14 gushtit, Liverpuli do të luajë në “Emirates Stadium” ndaj Arsenalit, në javën e parë të Premier League-s. /tesheshi.com/
https://youtu.be/K9MGCYlKMfI
