Klubi anglez i futbollit Liverpool mirëpriti auditimin e ngjarjeve rreth finales së Champions vitin e kaluar, i cili arriti në përfundimin se organizatorët, konkretisht Federata Evropiane e Futbollit (UEFA), ishin përgjegjës për kaosin para “Stade de France” para ndeshjes mes Liverpoolit dhe Real Madridit, raporton Reuters.
Fillimi i ndeshjes finale u vonua për 36 minuta, pasi një numër i madh i tifozëve të Liverpool nuk arritën të hyjnë në tribunat e “Stade de France”. Pamjet treguan policinë franceze duke përdorur gaz lotsjellës për të kontrolluar turmën, e cila përfshinte gra dhe fëmijë.
“Raporti shfajëson plotësisht tifozët e Liverpool-it, me UEFA që caktohet si më përgjegjëse për dështimet organizative, mungesën e kontrollit apo mbikëqyrjes në aspektin e sigurisë dhe sigurisë, si dhe planifikimin e dobët dhe mungesën e një plani emergjence”, thuhet në njoftimin për shtyp të Liverpool-it.
“Raporti i komisionit i bazuar në prova tregoi gjithashtu se ekzistonte një rrezik i qartë dhe i menjëhershëm i pasojave fatale dhe se veprimet e tifozëve të Liverpool shpëtuan jetë”, tha klubi anglez.
UEFA i ka kërkuar falje Liverpool-it
Pas publikimit të raportit të hënën, UEFA i kërkoi falje Liverpool-it, pasi më parë fajësoi tifozët e saj për çrregullimin.
Raporti tha se kishte paralele të dukshme midis ngjarjeve të finales së Ligës së Kampionëve të vitit të kaluar dhe tragjedisë së vitit 1989 në stadiumin Hillsborough, në të cilën 97 tifozë të Liverpool-it humbën jetën.
“Është tronditëse që më shumë se 30 vjet pas katastrofës së Hillsborough, çdo klub dhe tifozët tanë duhet të ekspozohen ndaj gabimeve të tilla sigurie, të cilat kishin një efekt kaq shkatërrues për shumë njerëz”, tha Liverpool. “Është edhe më shqetësuese të dihet se për familjet, miqtë dhe të mbijetuarit e Hillsborough, Parisi vetëm sa i ka përkeqësuar vuajtjet e tyre”.
Në raportin prej 220 faqesh, pas një hetimi të udhëhequr nga një anëtar i Parlamentit Portugez, Tiago Brandao Rodrigues, me ndihmën e konsulentëve ligjorë, policorë dhe organizativë, si dhe përfaqësues të grupeve të tifozëve, u theksuan 21 rekomandime, në mënyrë që kaosi që dëshmuam nuk do të përsëritej në të ardhmen në “Saint-Denis” më 28 maj të vitit të kaluar. /tesheshi.com/
