Në reagimet e ashpra të opozitës që pasuan miratimin në Parlament të disa ndryshimeve kushtetuese në funksion të hapjes së listave, pretendohej se me këtë akt, mazhoranca, posaçërisht kryeministri Rama, ishte vënë dhe kundër ndërkombëtarëve.
Por sa e vërtetë është kjo?
Në fakt, shefi i mazhorancës potencoi rregullisht atë që e konsideroi të drejtë sovrane të Parlamentit për të marrë një vendim për ndërhyrje në Kushtetutë, por kjo jo domosdoshmërisht ishte një fërkim me ndërkombëtarët.
Siç u vu re dhe këtë të enjte në reagimin e ndërkombëtarëve, këta të fundit ia njohën Parlamentit shqiptar këtë të drejtë, por kërkuan paralelisht dialog në Këshillin Politik mbi këto ndryshime.
Edhe në këtë pikë, ishin në të njëjtën linjë me Ramën, që gjithashtu “iu lut” opozitës për dialog.
Për SHBA, “ndërsa ky veprim ishte në kompetencën e Parlamentit, është për të ardhur keq që nuk u mor në të njëjtin frymë me të cilën u arrit marrëveshja e 5 qershorit”.
Ne i kujtojmë shumicës deklaratat e saj se, megjithë miratimin e sotëm në Parlament, ata synojnë të angazhohen me të gjithë partitë në Këshillin Politik, në mirëbesim dhe me qëllimin për të arritur në marrëveshje për zbatimin e legjislacionit mbi listat e hapura dhe koalicionet.
Ne e kuptojmë zhgënjimin e Opozitës së Bashkuar, ndërsa mirëpresim vendosmërinë e tyre për të mbetur të angazhuar në institucione dhe procese demokratike, përfshirë Këshillin Politik, në mënyrë që të dëgjohen zërat e të gjithë shqiptarëve. Përsërisim, se ne do të shohim nëse drejtuesit do ta mbajnë fjalën e tyre. Ashtu siç vepruan në arritjen e marrëveshjes së 5 qershorit, udhëheqësit shqiptarë duhet të tregojnë gatishmërinë dhe aftësinë e tyre për të negociuar marrëveshje që vënë në radhë të parë interesat më të mira të popullit shqiptar”, u tha nga ambasada e SHBA-së.
Nga Ana Pisonero, zëdhënëse në Bruksel, u tha:
“Ndërsa pranojmë miratimin nga Parlamenti i Shqipërisë të disa ndryshimeve në Kushtetutë në lidhje me sistemin zgjedhor, është për të ardhur keq që nuk pati më shumë kohë për të gjetur një kompromis me të gjitha partitë në Këshillin Politik.
Ndryshimet në kodin zgjedhor të miratuara nga Parlamenti më 23 korrik për të zbatuar marrëveshjen e 5 qershorit, bazuar në rekomandimet e OSBE / ODIHR, kanë përmbushur kushtin e vendosur nga Këshilli për hapjen e negociatave të pranimit.
Tani është thelbësore që ndryshimet në kodin zgjedhor për të zbatuar ndryshimet kushtetuese, në veçanti listat e hapura + koalicionet parazgjedhore, të diskutohen siç duhet me të gjithë aktorët politikë në Këshillin Politik në një mënyrë bashkëpunuese + gjithëpërfshirëse përpara se të votohen”.
“Përshëndes miratimin në Parlamentit për hapjen e listave. Është e rëndësishme që të gjitha partitë në Shqipëri, brenda dhe jashtë parlamentit, të vazhdojnë dialogun konstruktiv, që lejoi marrëveshjen e 5 qershorit për Reformën Zgjedhore, një kriter themelor për Bashkimin Europian”, shkroi Reporterja për Shqipërinë në PE, Isabel Santos.
“Është një hap i shkëlqyeshëm për Shqipërinë në rrugën drejt Evropës. Parlamenti shqiptar plotëson Marrëveshjen e Këshillit Politik dhe kërkesën e Bundestagut për të miratuar një rekomandim të OSBE-së bazuar në Reformën Zgjedhore dhe demokratizuar më tej procesin zgjedhor. Ju lutemi punoni së bashku edhe në të ardhmen”, shkroi Nikolas Lobel, raportuesi i CDU-së për Shqipërinë.
Pra, siç mund të vihet re, ndërkombëtarët kanë vuajtur mungesën e konsensusit dhe kërkojnë pikërisht këtë këtej e tutje, por nuk kanë kundërshtuar miratimin e ndërhyrjeve në Kushtetutë në funksion të listave të hapura. /tesheshi.com/
