Ashtu siç kishte premtuar, kryeministri Rama morri pjesë në mbledhjen e Këshillit Politik, edhe pse pa prezencën e Bashës, ku mbrojti tezën e tij të hapjes së listave me një ndryshim në kod zgjedhor nëpërmjet ndëryrjes në Kushtetutë.
Rama i kujtoi përfaqësuesve të opozitës, edhe faktin se ata s’kishin votat për marëveshjen e 5 qershorit. Kësisoj, listat e hapura duhej të merreshin në konsideratë dhe për votat e opozitës në parlament.
“Marrëveshja duhet miratuar. Për t’u miratuar duhen votat ne Kuvend që ne si mazhorancë nuk i kemi. Në bisedimet me opozitën parlamentare jemi dakordësuar për hapjen e listave. Ajo çka kërkojmeë është që hajdeni ulemi dhe me sa më shumë dakordesi të reflektojmë në kod këtë sanksionim të hapjes së listave që vjen nga ndryshimi kushtetutes”, tha Rama.
Por i “dërguari” i Bashës në Këshill, Gazmend Bardhi, tha se ajo çfarë kërkon Rama do të thotë ridiskutim i marrëveshjes së 5 qershorit.
“Kuptuam nga diskutimi i Kryetarit të Partisë Socialiste që qëllimi është të rihapim edhe njëherë diskutimin për përmbajtjen e marrëveshjes së 5 Qershorit dhe të bëjnë ndryshime të saj. Ne i qëndrojmë firmës sonë dhe deklarojmë që nuk mund të rishihet apo rishkruhet asnjë fjalë ndryshe nga ajo që palët kanë dakordësuar dhe nënshkruar bashkërisht. Çështjet që ju shtruat bien në kundërshtim dhe ndryshojnë Marrëveshjen e 5 Qershorit dhe prishin dakordësinë që ne kemi arritur aty.
Gjithashtu, në mbledhjet e Këshillit Politik, por edhe gjatë diskutimeve në Rezidencën e Ambasadores së SHBA-së, përfaqësuesi zyrtar i Partisë Socialiste nuk ka dhënë konsensusin për ndryshimin e sistemit zgjedhor dhe ka dakordësuar se kjo çështje nuk mund të diskutohet tani, por në një fazë më të vonshme. Ky fakt konfirmohet edhe nga përmbajtja e marrëveshjes së 5 Qershorit, ku specifikohet në shënimin nr. 2 që ‘nuk ka konsensus për ndryshimin e sistemit'”, tha Bardhi.
Por Rama e sqaroi dhe njëherëse nuk bëhet fjalë për ndryshim sistemi.
“Ne nuk ndryshojmë as sistem, as zona zgjedhore. E vetmja gjë është që po hapim listat. Edhe për hapjen e listave, hajdeni ulemi nëse keni ndonjë mendim se si të garantojmë kuotën gjinore sa më mirë. Nuk ndalojmë koalicionet por forme grupimi që të mundësojë hapjen e listave dhe të mos ndërlikojë administrimin. Korrektimi në kod i përket vetëm pjesës së hapjes së listave dhe nuk cënon përmbajtjen e dokumentit. Pra nuk u ndalon njeri të bëni aleancat tuaja”, tha Rama, duke argumentuar se kështu shkohet drejt një modeli siç e ka Europa. /tesheshi.com/
