Kryetarët e famëkeqeve kooperativa të sistemit komunist (një pjesë e mirë e tyre), u riatakuan në sistemin e ri me rënien e regjimit, duke ndryshuar lëkurën, madje duke u bërë më antikomunistë se vetë disidentët realë. Duke njohur territorin dhe hiletë e PR folklorik, i kanë mbetur politikës shqiptre duke u ngjitur deri në Parlament.
E njëjta gjë siç duket po ndodh dhe me kryetarët e fuqishëm të komunave, të cilët një pjesë e mirë qëndrojnë në pushtet për sa e sa mandate duke e zhvlerësuar realisht konceptin e votimeve si një mjet për rifreskimin e administratorëve vendorë.
Në zgjedhjet e 21 qershorit, komunat nuk do të jenë më. Ato u zhdukën nga harta territoriale administrative e Shqipërisë, por jo kryetarët e tyre. Ndërkohë që një pjesë e tyre do të kandidojnë për kryetarë bashkish të mëdha, thuajse të gjithë do të jenë në rreshtat e parë të anëtarëve të këshillave bashkiake.
Siç mësohet ky është një ngërç i ri që është krijuar në mes partive të mëdha PS e PD dhe ndërkombëtarëve, sidomos pas deklaratës së fundit të ambasadorit amerikan për ta pastruar listën e kandidatëve nga emra që janë të lidhur me krimin apa kanë rekorde kriminale.
Ndërkaq, largimi i menjëhershëm do t’u kushtonte partive humbjen apo prishjen e një numri të konsiderueshëm votash që ata kontrollojnë. SHBA dhe BE po vazhdon të bëjë presionin e tyre pikërisht edhe për kryekomunarët që po qëndrojnë si gozhdë në politikë. Përpara se të mbyllet lista e kanidatëve për këshilltarë, pritet që të ketë një pastrim i tyre, por sipas gjasave jo përfundimtar…
/tesheshi.com/
