Edi Rama, më shumë se 4 vjet më parë, ka fshirë thuajse gjysmën e elitës së Partisë Socialiste, duke e zëvendësuar gati totalisht listën përfaqësuese.
Thuajse çdo qark ka largime të bujshme dhe ardhje thuajse të panjohura.
Arta Dade është mënjanimi më i madh, pasi ish-ministrja disa herë e PS-së dhe kryetare e komisionit të jashtëm, nuk rezulton fare në listat e deputetëve, ndërkohë që nuk ishte thënë asgjë për këtë largim as nga ajo vetë e as nga selia rozë.
Dje folën Valentina Leskaj, Piro Lutaj etj, por jo Dade.
Gazeta “Dita”, e cila është pronë e djemve të Dades e kishte vënë këtë fat në ballinë, duke e ilustruar me një karikaturë, ku Edi Rama përfundimisht e ka fshirë PS-në nga historia duke e zëvendësiar me Rilindjen.
Dhe në fakt PS-ja e vjetër thuajse nuk ekziston. Përveç një grupi si Gramoz Ruçi, Anastas Angjeli, Pandeli Majko, Bashkim Fino dhe Fatmir Xhafa, të gjithë të tjerët i përkasin një historie shumë të re, madje as të opozitës së Ramës, por kohës së 4 vjeçarit në pushtet.
Ndryshime ka në çdo qark thuajse tërësisht: Në Shkodër, përveç përjashtimit të Tom Doshit dhe ikjes së Hafizit me Libra-n, nuk është kandiduar as Namik Kopliku, ndërkohë që ka ardhje të reja. Senida Mesi, një financiere që i përket pjesës qytetare shkodrane, pjesëtare e një familje me reputacion të besimit musliman duket se është një sinjal pozitiv.
Më pas lista ka Luan Harushën, që duket që nga mbiemri që është një tomdosh i ri, por më i moderuar. Atij i duhet të mbledhë votat e fshatrave përreth Shkodrës të quajtura Rrethina, ku janë grumbulluar të ardhurit nga Alpet.
Ndërkaq, Kukësi gjithashtu është rinovuar totalisht. Mimi Kodheli zhvendoset nga Lezha për në këtë qark verior, por realisht motori i atyshëm është Safet Gjiçi, presidenti i klubit të futbollit të Kukësit, i cili është vënë i dyti pikërisht për t’i siguruar PS-së atë shifër deputetësh që nuk e ka marrë deri më sot.
Dibra nuk ka prurje vendore apo ruajtje të listës së vjetër. Ulsi Manja është sjellë në Tiranë, ndërkohë që Ilir Beqja është transferuar si kreu i listës së Dibrës. Edhe PS edhe PD e trajtojnë Dibrën si një vend të frikshëm, ndaj s’kanë besim tek dibranët duke zgjedhur të dërgojnë aty njerëz prej qendrës.
Përveç Ilir Beqajt që është i pari, ndërsa e dyta është Almira Xhembulla, e panjohur deri tani si person, por që i përket një familjeje të njohur nga Peshkopia me tradita të forta qytetare. Halit Palamani që përfaqëson Matin është i treti, kurse Bulqiza është lënë në një vend më poshtë, e atërta ku është rankuar ish-kryetari i bashkisë, Myfit Duriçi.
Është zhdukur Shkëlqim Cani, ndërsa rikthehet Naim Asllani ish-kandidati i PS-së për njësinë 11 në vitin 2011.
Lista e Lezhës, ka sërish një “të fortë”, një ish-oficer i lartë policie. Ai është Pjerin Ndreu, i cili qëndron i dyti pas Lindita Nikollajt. E kjo është ambicja që PS të marrë në këtë qark ku përgjithësisht fiton PD, por që në legjislaturën e shkuar u bë e famshme për mbarimin e emrave si pasojë e daljes së problemeve penale për kandidatët apo deputetët e qarkut.
Në Elbasan, përveç Ben Blushit, mungesa e madhe është edhe Alfred Peza, aktualisht sekretar për lidhjet Dixhitale në PS, i cili është penalizuar si pasojë e hetimit të nisur ndaj tij për çështjen e aksioneve 1 milionë USD në Bankën Credins. Ndërkaq, është andiduar Luan Dusha, i cili së fundi kaloi nga LSI-ja në PS, duke i siguruar 71 votat qeverisë së Edi Ramës. Bie në sy gjithashtu e që është paralajmaëruar kohë më parë nga tesheshi.com, kandidimi aty i Anastas Angjelit, një minoritar që nga Saranda, zona nga është, kaloi në Gjirokastër, e tani ngjitet në Elbasan
Në Korçë mungon Arta Dade dhe bie në sy Sotiraq Bratko, aktori i njohur korçar që njihet nga personazhi i Tirkës tek Zonja nga Qyteti.
Në Korçë është vendosur Elisa Spiropali, e cila kandidon për herë të parë. Po në Korçë është i dyti në listë Eduar Shalësi, i cili e ka mandatin e tretë që lëviz nga Tirana, Berat e Korçë. Bie në sy se në listën fituese të Korçës është Edlira Bode, një kandidate me mbiemrin e ish -ministrit të Financave që duket se kërkon vota në fshatrat e Korçës ku PS ka pasur gjithnjë problem për të fituar.
Në Vlorë, lista është rinovuar tërësisht. Damian Gjiknuri kryeson grupin dhe e dyta është Vilma Bello, ndërsa Alket Hyseni i cili mbulon Delvinën është vënë i treti.
Gjirokastra nuk ka shumë për të thënë pasi ka dy ministra në vendet e para, ndërkohë që i treti është Flamur Golemi, një drejtues lokal në Gjirokastër.
Në Tiranë janë përqendruar numri më i madh i deputetëve apo elitës së PS-së, ku lista nuk kryesoret më nga Pandeli Majko por nga Elona Gjebrea. Një lëvizje e sjellshme për t’i hequr rolin e drejtuesit ish-kryeministrit.
Por mungesa më e madhe në Tiranë është natyrisht Ledi Shamku, e cila përveç se një intelektuale e spikatur është edhe një mike personale e Edi Ramës.
Në Fier lista thuajse ka të njëjtën vijimësi pra gjysma janë të rinj por janë ruajtur Gramoz Ruçi, Erjon Braçe, ndërkohë që janë larguar Arben Çuko dhe Piro Lutaj. /tesheshi.com/
