Presidenti Meta i është kthyer gjuhës së tij të para një viti, asaj të ashpër ndaj mazhorancës, deri në cilësimin si “haxhiqmiliste”, e kjo pas propozimit për ndryshimin e dy neneve kushtetuese që i hapin rrugë listave të hapura, por që njëherësh ndalojnë dhe kolaicionet parazgjedhore.
Për Metën, me gjuhën e zëdhënësit Blushi, ai parlament që do votojë këto ndryshime, s’është legjitim.
“Lidhur me lajmet e fundit për disa ndryshime kushtetuese, Presidenti i Republikës Sh.T.Z Ilir Meta thekson se Kuvendi aktual ka vetëm 82 deputetë legjitimë, ku përfshihen edhe tre deputetët të cilët nuk pranuan të dorëhiqeshin pas vendimit të Opozitës së Bashkuar. 182 deputetë dhe kandidatë për deputetë të partive opozitare refuzuan të ishin pjesë e Kuvendit.
Edhe pse shteruan të gjitha listat e partive opozitare prej 18 muajsh, Kuvendi ka formalisht vetëm 122 deputetë nga 140 deputetë që është detyrimi kushtetues. Procesi i zëvendësimit ka qenë haptas antikushtetues dhe antiligjor. Ndaj është koha t’i jepet fund çdo marrëzie, fundi i së cilës dihet qartë.
E ardhmja europiane e Shqipërisë është alternativa e vetme e të gjithë qytetarëve të këtij vendi. Të gjithë të distancohen nga aventurierët dhe Haxhi Qamilët! Shqipëria e para! Shqipëria si gjithë Europa“, thuhet në reagimin e Presidencës.
Kështu, dhe njëherë, hapur dhe qartazi, kreu i shtetit është bërë palë me opozitën, kundër mazhorancës që e ka propozuar dhe votuar si president. /tesheshi.com/
