Lista Serbe pritet të rikthehet në institucionet e Kosovës, dy muaj pas vetëlargimit. Shtypi në Prishtinë shkruan sot se, burime të afërta me zhvillimet brenda Qeverisë dhe Listës Serbe kanë thënë se të hënën ose të martën serbët do të bëjnë publik vendimin e tyre për t’u rikthyer në institucione.
Por, si kompensim Lista Serbe ka parashtruar disa kërkesa, të cilat ndërlidhen kryesisht me Asociacionin e Komunave Serbe. Ato janë trajtuar në takime të shumta që zyrtarë të Qeverisë së Kosovës kanë zhvilluar javët e fundit me Listën Serbe. Një burim i afërt me këto takime i ka thënë gazetës Koha Ditore se Lista Serbe ka kërkuar që të bisedohet sa më shpejt për Asociacionin në Bruksel dhe të publikohet statuti i tij.
Në tekstin e marrëveshjes 15 pikëshe të Brukselit të 19 prillit 2013, të parafuar nga kryeministrat e Kosovës dhe Serbisë, nën një thuhet: “ Do të ketë një Asociacion / Bashkësi e komunave të banuara me shumicë serbe në Kosovë. Anëtarësimi do të jetë i hapur për cilëndo komunë, me kusht që anëtarët pajtohen”.
Nga gjithesej 38 komuna në Kosovë, 10 janë me shumicë serbe, pesë të reja të Paketës Ahtisaari, të procesit të decantralizimit, e më e reja është komuna e Mitrovicës Veriore.
Lista Serbe në zgjedhjet parlamentare 2014 ka marrë 9 nga 10 vendet e deputetëve të komunitstit serb në parlamentin 120 anëtarësh, ndërsa në koalicionin për qeverinë e re tre poste – një zëvendsëkryeministër dhe dy ministra.
Përfaqësuesit e Listës Serbe në Kuvend dhe në Qeverinë e Kosovës vazhdojnë bojkotin prej 3 shkurtit, kur kryeministri kosovar Isa Mustafa shkarkoi ministrin serb për Komunitete dhe Kthim, Aleksandar Jablanoviç, pasi deklarata e tij ku protestueset në Gjakovë i kishte quajtur “egërsira” shkaktoi shumë reagime dhe protesta, madje edhe të dhunëshme.
