Duket e sigurt që Kosova më në fund do të ketë qeverinë, pjesë e së cilës pa dyshim do të jetë Lista Serbe, e cila të enjten do të mbështes zgjedhjen e Kadri Veselit për kryetar të Kuvendit nga koalicioni PAN, dhe me pas edhe qeverinë e re.
Në këmbim të mbështetjes, Lista Serbe do të marrë postin e zv. kryeministrit dhe tri ministri.
“Po pritet për t´u konfirmuar përfundimisht nëse koalicionin e madh do të mbështesin lideri i Aleancës për Kosovën e Re, Behgjet Pacolli, si dhe deputetët Ilir Deda dhe Mimoza Kusari. Lista serbe është e pashmangshme, sepse pa të nuk ka shumicë”, shkruan portali serb “Blic”.
“Në qeverinë e fundit Lista Serbe kishte një zv/kryeministër dhe dy ministra, ndërsa tani do të duhej të ketë një zëvendëskryeministër dhe tre ministra. Me shumë gjasa serbëve do t’u takojnë Ministria e Pushtetit Lokal, ajo për Komunitete dhe Kthim, si dhe Ministria e Bujqësisë”.
Kusht tjetër i Listës serbe do të jetë implementimi i marrëveshjes së Brukselit për të cilën janë dakorduar të dyja palët pjesëmarrëse në bisedime, si dhe formimi i dy komunave të reja me shumicë serbe.
“Serbët gjithashtu do të insistojnë të formojnë dy komuna të reja. Njëra është Prilluzhë-Plemetin me shumicë serbe, e cila tani është në kuadër të komunës së Vushtrrisë me shumicë shqiptare. E dyta është Gora, me shumicë gorane. Goranët tradicionalisht janë treguar besnikë ndaj Serbisë. Komuna e Gorës ka ekzistuar më parë, por autoritetet në Prishtinë e kanë ‘shuar’ për shkak të besnikërisë ndaj Serbisë”, shkruan media serbe. /tesheshi.com/
