“Përfaqësuesit politikë serbë në Kosovë nuk kanë marrë ende asnjë vendim për të hyrë në ndonjë koalicion të mundshëm”, tha kryetari i Listës Serbe, Goran Rakiç, duke shtuar se një votë e mundshme për formimin e institucioneve të Kosovës nuk është vetëm mbështetje bosh.
Në një intervistë për “Politika”, ai tha se qëndrimi i Listës Serbe për partitë shqiptare varet nëse do të tregojnë mirëkuptim për problemet dhe aspiratat e popullit serb në Kosovë.
Kjo deklaratë e Rakiçit tregon qartë se “Srpska” do të rrisë pazarin për të qenë pjesë ose për të përkrahur koalicionin qeverisës.
Sipas raportimeve të fundit të mediave serbe, Formimi i Asociacionit të Komunave serbe, pjesëmarrja e serbëve në institucione me kapacitet më të madh, formimi i komunave të reja me shumicë serbe si dhe garancitë se pa përfaqësues të serbëve nuk do të shkelet mbi pasurinë që u takon atyre, janë vetëm disa nga kërkesat e Listës Srpska, e cila do t’i paraqesë nëse arrihet marrëveshja për koalicionin qeverisës. /tesheshi.com/
