Shefi i zyrës për marrëdhënie me media i Listës Serbe, Igor Simiq ju ka bërë të qartë partive shqiptare se pjesëmarrja në qeverinë e ardhshme do të varet nga plotësimi i kërkesave të tyre, ndërsa ka bërë të ditur se ende nuk kanë zhvilluar bisedime.
Ai thotë se Asosacionin e Komunave serbe apo siç njihet edhe si “Zajednica” është kurora e të gjitha kërkesave të tyre, dhe nuk do të tërhiqen as një milimetër.
Simiç më tej ka pohuar se të gjitha vendimet, do t’i marrin në marrëveshje me Beogradin, dhe se nuk janë të gatshme të rishikojnë çfarëdo marrëveshje që është arritur në Bruksel.
“Periudha kur përfaqësuesit serbë janë gënjyer në Prishtinë, ka mbaruar. Ne nuk mund të zgjedhim se kush do të jetë në qeverinë e re, por mund të zgjedhim se a do të jemi në atë qeveri ose jo. Formimi i Asociacionit të komunave me shumicë serbe mbetet kushti kryesor për hyrjen në qeveri. Poashtu ekzistojnë edhe një numër i madh i kërkesave që dalin nga problemet që kanë serbët e Kosovës, sikurse furnizimi i barnatoreve me barëra dhe mjete mjekësore, sidomos në veri të Kosovës, si dhe furnizimi me tekstet mësimore dhe dokumente të tjera, të cilat shpeshherë janë ndaluar në vendkalimet kufitare”, ka thënë Simiç për Radio “Evropa e Lirë”.
Ai shton se Lista Serbe nuk do t’i vlerësojë partitë politike shqiptare në bazë të asaj se çfarë kanë thënë gjatë fushatës zgjedhore, por marrëdhëniet me to do të varet në bazë të asaj se cila do të jetë qasja e tyre ndaj serbëve dhe përfaqësuesve të tyre.
Ai më tej ka thënë se nuk i intereson se cili do të jetë numri i ministrive apo vendeve tjera të punës me kompetencë ekzekutive, por vetëm zgjidhjet konkrete që do lehtësonin jetesën e serbëve të Kosovës.
Kujtojmë se Lista Serbe, si përfaqësuese e komunitetit serb ka fituar 9 ulëse në Kuvendin e Kosovës. /tesheshi.com/
