Ramush Haradinaj përmes avokatit të tij Arianit Koci do të bëj padi ndaj Listës Serbe, parti parlamentare e pjesë e koalicionit qeverisës në Kosovë, që e cilësoi kreun e AAK-së si “kriminel lufte”.
“Ramush Haradinaj më ka autorizuar që në emër të tij, të deponojë padi për shpifje dhe fyerje kundër subjektit politik, Lista Srpska. z. Haradinaj dëshiron që çështjet dhe deklarimet me dimension shpifës dhe fyes, të dalin prej fushës politike, dhe të zhvendosen ku e kanë vendin, në Gjykatë. Ky shtet duhet dhe do të funksionojë, mbi bazën e Kushtetutës dhe Ligjeve të Republikës së Kosovës”, ka bërë të ditur Koci.
Ndaj “Srpska”-s ka reaguar edhe kryetari i grupit parlamentar të AAK-së, Pal Lekaj, i cili thotë se kjo listë duhet të shpallet e “pa dëshiruar”.
“Reagimi i mbrëmshëm kundër ish-kryeministrit, Ramush Haradinaj, i një grupi banditësh të veshur në petkun e politikanëve, siç është Lista Serbe, do të duhej të ishte arsyeja e mjaftueshme për institucionet e Kosovës që ky grup destruktiv i pinjollëve të Nikoliçit, Vuçiqit e Daçiqit, të shpallej ‘i padëshiruar’ dhe të njëjtit të largohen nga qeveria. Këta dhe të gjithë kundërshtarët e Ramushit e të Kosovës duhet ta dinë se nuk jemi pa miq e pa aleat. Prandaj nuk duhet t’iu vjen mërzi pse shumë burrështetas shfaqin habinë për ndalimin e kryetarit Haradinaj dhe presin lirimin e tij të shpejtë”, ka shkruar Lekaj.
Cilësimet e Listës Serbe ndaj Haradinajt erdhën pas deklaratës së ish presidentit kroat, Stjepan Mesqit i cili tha se liderin e AAK-së, e ka mik dhe se pret lirimin e shpejt të tij.
Ndryshe, qeveria “Mustafa”, ka heshtur deri më tani ndaj deklaratave skandaloze dhe çetnike të bëra nga partneri i tyre i koalicionit. /tesheshi.com/
