Pak ditë më parë, Kryeministri Edi Rama paralajmëroi për një listë me 124 emra të personave që dyshohet se janë përfshirë në kultivimin dhe trafikimin e lëndëve narkotike. Lista është konfirmuar edhe nga ministri teknik i Brendshëm, Dritan Demiraj.
Ndërkohë në lidhje me këtë listë ka reaguar Lëvizja Socialiste për Integrim, e cila përmes deputetit Luan Rama, i cili i ka drejtuar disa pyetje Kryeministrit.
Deputeti i LSI shprehet se Edi Rama duhet të sqarojë nëse lista është referuar apo jo në Prokurori dhe në rast se po, atëherë çfarë po bën organi i akuzës.
Por sipas Ramës deri më tani prokuroria ende nuk ka nisur hetime dhe emrat e tyre as që janë bëtë publik.
Komenti i Luan Ramës
E paralajmëroi Kryeministri, e pas tij e konfirmoi edhe Ministri i Brendshëm se kanë në dorë një listë me 124 emra kriminelësh që merren me kultivimin dhe trafikimin e drogës!
Po deri tani vetëm kaq! Ose të paktën për publikun asgjë më shumë…
Natyrisht që jo çdo gjë i duhet thënë publikut, pasi specifika e shërbimeve të këtij lloji imponon rregulla strikte të ruajtjes së sekretit profesional.
Por një gjë duhet të na e thotë Kryeministri:
A është, përkatësisht, a janë relatuar çështjet në Prokurori?
Dhe nga ana tjetër, çfarë po bën Prokuroria?
Kaq ditë pas shpalljes publike se ekziston një listë me emra trafikantësh të drogës, madje edhe të lidhur e suportuar prej policisë apo segmenteve të politikës, a ka ndërmarrë ajo ndonjë veprim procedurial qoftë edhe kryesisht?…
Sepse mund të ndodhë që zjarret që po djegin vendin, të djegin edhe listën e kriminelëve të drogës! Prokuroria nuk është para ndonjë thashethemi, po para deklarimeve zyrtare e publike të Kryeministrit dhe Ministrit të Brendshëm. /tesheshi.com/
