Ndërkohë që ditën e djeshme një pjesë e madhe e akseve rrugore në Shqipëri paraqitën problem në lëvizjen e mjeteve dhe u bllokuan për shkak të rënies së reshjeve të dëborës në veri e jug, Autoriteti Rrugor Shqiptar dhe Drejtoria e Përgjithshme e Shërbimeve të Transportit Rrugor bëjnë me dije se sot është lehtësuar qarkullimi në zonën e jugut, ndërsa vijojnë të paraqiten problematike disa akse në veri.
Këto probleme vijnë për shkak të shembjeve të rrugës ose skarpateve në disa segmente.
Në Rajonin Verior Shkodër, vazhdojnë të jenë të bllokuara dy korsi të autostradës, për shkak të masiveve shkëmbore që kanë rënë. Për eliminimin e tyre specialistët dhe grupet e ngritura nga ARRSH po shqyrtojnë mundësinë e përdorimit të lëndëve plasëse.
E njëjtë vazhdon situata edhe në shkarjet e ndodhura në Bushtricë dhe në aksin Krumë-Qafë Prush.
Në aksin Bajram Curri – Fierzë, 7 km nga Bajram Curri, ka ndodhur ditën e djeshme një shkarje e materialit të pjesës së sipërme të rrugës, që ka sjellë edhe dëmtimin e murit pritës të saj. Për momentin qarkullimi në këtë aks është me një kalim. Vazhdon puna për pastrimin e aksit.
Në Rajonin Qendror Tiranë dhe në Rajonin Jugor Gjirokastër, sot raportohet se nuk ka probleme për qarkullimin e mjeteve në të gjitha akset e këtyre rajoneve./tesheshi.com/
