Një biznesmen i marrë peng 6 muaj më parë është liruar sot pas një operacioni të forcave special të policisë dhe shërbimit sekret grek.
Mihalis Lembidakis, aksioner i Bankës së Kretës dhe pronar i një sërë biznesesh të fuqishme në këtë ishull, ishte marrë peng nga persona ende të paidentifikuar.
Biznesmeni 54-vjeçar u gjet i lidhur në një magazinë në afërsi të Rethymnos. Ai ishte në gjendje të mirë shëndetësore, por u dërgua për një kontroll në spital, nën masa të rrepta sigurie. Për lirimin e tij pengmarrësit kishin kërkuar fillimisht shumën prej 100 milionë eurosh, por më pas e ulën kërkesën e tyre deri në 18 milionë.
Për lirimin e Lembidakis në ishullin e Kretës ishte dërguar një ekip i posaçëm i policisë greke dhe hetimet bëheshin vetëm prej tyre. Në ndihmë të policisë ishin vënë edhe shërbimet sekrete.
Familja Lembidakis është një ndër më të pasurat në ishullin e Kretës, nuk arriti të mbledhë më shumë se 10 milionë euro, çka duket se nervozoi pengmarrësit, të cilët humbën kontrollin e situatës. Duket s ky ishte momenti i shumëpritur për policinë, e cila arriti të zbulojë vendndodhjen e pengut.
Lidhur me pengmarrjen janë arrestuar 7 vetë, të gjithë banorë të Kretës, ndërsa hetimet vazhdojnë. Në Greqi pengmarrjet e biznesmenëve kanë qenë të rralla, pasi autoritetet greke kanë reaguar shpejt dhe me efikasitet të lartë. /tesheshi.com/
