Deputetët e Vetëvendosjes që u arrestuan të mërkurën se hodhën gaz në seancë për të pamundësuar ratifikimin e Demarkacionit me Malin e Zi janë liruar nga Gjykata Themelore e Prishtinës edhe pse Prokuroria kërkoi paraburgim për ta.
Gjykata ka vlerësuar se në këtë fazë të procedurës nuk ka qenë e nevojshme caktimi i masës së paraburgimit për shtatë vetëvendosësit Drita Millaku, Xhelal Sfeçla, Salih Zyba Fitore Pacolli, Valon Ramadani, Liburn Aliu dhe Arbërie Nagavci pasi nuk ekziston ndonjë rrethanë e veçantë në bazë të cilës do mund të konkludohet se ekziston rreziku i arratisjes së pandehurve me qëllim të shmangies nga përgjegjësia penale.
Sipas gjykatës të njëjtit kanë premtuar se do të përgjigjen në të gjitha ftesat që do t’ju dërgohen dhe po ashtu nuk ekziston as rreziku i përsëritjes se këtyre veprimeve nga ana e të pandehurve të përfshirë në këtë çështje penale.
Vetëvendosësit pas lirimit janë kthyer në Kuvend ku po mbahet seancë plenare me ç’rast u pritën me duartroktije nga kolegët e tyre të VV-së.
/tesheshi.com/
