Nga Blendi Gashi
Lirimi i Ramushit nga autoritetet franceze me të drejtë ka gëzuar të gjithë shqiptarët, jo vetëm në Kosovë duke ditur se ai u arrestua me flet-arrest të Serbisë, dhe lirimi i tij shihet si fitore e shqiptarëve ndaj Serbisë, gjë që e pohoi edhe vetë Haradinaj pas vendimit të autoriteteve franceze.
Ndonëse bashkëpartiakët e Haradinajt drejtuan gishtin edhe kah pushteti për arrestimin e tij, sot të gjithë, si drejtues të shtetit, politikanë të të gjitha partive ngarendën për të shkruar mesazhe në profilet e tyre në Facebook pas lirimit, në mbrojtje të UÇK-së, duke thënë se u dëshmua edhe një herë lufta e pastër për liri.
Shprehja e gëzimit përmes rrjeteve sociale për lirimin e Haradinajt nga qytetarët, bashkëpartiakë të tij, opozitarë e pushtetarë të caktuar që e vizituan dhe e përkrahën pa rezervë në Francë, ku për katër muaj u mbajt pa të drejtë, mund të mirëkuptohet, por jo edhe reagimi i tre krerëve të shtetit.
Presidenti Thaçi, kryeministri Mustafa dhe kryekuvendari Veseli gjatë katër muajve jo që nuk morën mundimin ta vizitojnë Ramushin në Francë por nuk shkuan për vizitë as në selinë e AAK-së siç bënë kryeministri i Shqipërisë Edi Rama dhe kryekuvendari Ilir Meta.
Andaj, reagimet e tyre sot më shumë mund të cilësohen si reagime të “detyruara” ku si ish- drejtues të UÇK-së gjithsesi duhet të japin një mesazh patriotik në mbrojtje të UÇK-së.
Dhe këtë e bëri i pari Thaçi i cili përmes një shkrimi në Facebook, e cilësoi lirimin e Ramushit lajm të mirë për Kosovën, derisa shtoi se “Edhe një herë u vërtetua që shpifjet e shërbimeve serbe kundër Ushtrisë Çlirimtare të Kosovës janë të paqëndrueshme dhe nuk përfillen nga bota demokratike”.
Kurse, Veseli vendimin për lirimin e Haradinajt e ka quajtur të pritshëm, derisa ka shkruar në Facebook se “Ndalimi i tij, mbi bazën e një urdhër-arresti ndërkombëtar të lëshuar nga Serbia, ishte i papranueshëm dhe raste të tilla nuk duhet të përsëriten më”.
Ndërsa, kryeministri Mustafa ende nuk ka reaguar në emër të tij, por qeveria përmes një kumtese ka përshëndetur lirimin e Haradinajt, duke thënë se “ngadhënjeu e drejta mbi manipulimet serbe”
“Injorimi i AAK-së pas arrestimit të Haradinajt”
Për injorimin që krerët e shtetit i bën AAK-së me rastin e arrestimit të kreut të saj, shprehu nervozizëm edhe zëdhënësi i kësaj partie Muharrem Nitaj.
“Ramush Haradinaj sot është politikani më popullor në Kosovë dhe jo vetëm, prandaj si është e mundur që ai të mos lejohet të jetë e të punojë për popullin e tij, por të mbahet me akuza të Serbisë, të cilave nuk u beson as ajo vet!.
Partinë e zotit Haradinaj këto ditë e vizituan edhe Kryeministri Shqiptar edhe Kryetari i Parlamentit, por një gjë e tillë nuk u shkoi ndërmend as Kryeministrit e as Presidentit të Kosovës, edhe pse zyrat e tyre nuk janë më larg se ne fund të së njëjtës rrugë! Në mos për asgjë tjetër, të paktën për t’i informuar bashkëpunëtorët e tij, se çfarë kanë bërë krerët e shtetit që kjo farsë të marrë fund. Apo s’kanë pas çfarë të thonë”, deklaroi Nitaj, derisa Ramushi mbahej në Francë. /tesheshi.com/
