Vetëm pak orë pas ngritjes së kallëzimit penal kundër kryebashiakut, Vangjush Dako nga ana e kreut të opozitës, Lulzim Basha, prokuroria e Durrësit nis hetimet për lirimin e të dënuarit Lul Berisha.
Hetimi ka marrë spunto pasi organi i akuzës ka dyshime që zyrtarë të caktuar mund të kenë kryer veprime në kundërshtim me ligjin, me qëllim krijimin e kushteve për pranimin e kërkesës për lirim para kohe me kusht të të dënuarit Lulzim Berisha.
“Po shqyrtohen ligjshmëritë e vendimeve të dhëna në kohë të ndryshme për të dënuarin Lulzim Berisha nga gjyqtarë të Gjykatës së Durrësit, për përfitim të uljes së dënimit, përfitimit të amnistisë, si dhe ndryshimin e vendit të vuajtjes së dënimit nga Burgu i sigurisë së lartë, në atë të zakonshëm”, thuhet në njoftimin e prokurorisë, e cila sqaron se Lulzim Berisha ka përfituar nga një seri e gjatë vendimesh gjykate për ulje dënimi, si edhe ka përfituar nga ligji i vitit 2012 “Për Amnistinë”.
Gjithashtu, në vendimin e Gjykatës së Apelit Durrës, shkruhet se “Bashkia Durrës, duke vlerësuar gjendjen e kësaj familjeje, sjelljen e tyre në komunitet, si dhe mundësinë e lirimit të të dënuarit, garanton punësimin e të dënuarit Lulzim Berisha, në pamundësi për tu punësuar në ndonjë subjekt privat”.
Lul Berisha, i njohur edhe si ish-kreu i bandës së Durrësit u lirua pak ditë më parë nga gjykata e Apelit të Durrësit, ndërsa kryente dënimin për vepra të rënda kriminale.
Ai u lirua me arsyetimin se kishte probleme shëndetësore dhe se kishte treguar shenja pendese. Kreu i opozitës akuzon drejtëpërdejtë Vangjush Dakon se ka ndërhyrë për lirimin e tij nga burgu para kohe. Lirimi i tij ngjalli shumë reagime, mes tyre edhe ambasadori amerikan Donald Lu./tesheshi.com/
