Nga Blendi Gashi
Pas vendimit të Gjykatës për lirimin e Azem Sylës për t’u mbrojtur në liri deri në epilogun e procesit gjyqësor, ka reaguar vetëm Lëvizja Vetëvendosje, e cila kritikon sistemin e drejtësisë duke thënë se me vendime të tilla duhet harruar liberalizimi i vizave, ndërsa kanë heshtur partitë tjera duke përfshirë këtu edhe PDK-në.
Deputetja e VV-së, Drita Millaku, ironizon me drejtësinë, duke thënë se ky sistem me vendimet e marra po tregon se po përparon.
“Pa/drejtësia në Kosovë ka një emër Kalludra. ‘Sistemi i drejtësisë ka përparuar dukshem, nuk po i merr n’qafë ata që s’kanë uzurpuar’. E liruan Azem Sylen mbrojtje në liri!!!! “Ne po tallemi me drejtësi po shiqoni bash askund s’mund të gjeni gjyqëtar si në Kosove, e kuptuam arsyen pse po na thonë votoni demarkacinin se toka ska çka iu nevoitet”. Për toka as burg spo mbajnë…
‘I uzurpuan ia ndanë atyre që i shpërblyen për me ardhë në pushtet dhe asgje bash hiq as dënim s’kanë’!!! Harroni liberalizim pa luftuar korrupsionin, një ishte i arrestuar për korrupsion edhe atë e liruan|, shkruan ajo në Facebook.
Kurse deputetja tjetër e VV-së, Albulena Haxhiu, ka thënë se Ministrja e Integrimit Evropian, Dhurata Hoxha dhe Ministri i Drejtësisë, Abelard Tahiri, po hedhin hi syve me deklarata mashtruese kinse në Kosovë po luftohet korrupsioni. Ajo shton se me gjyqësinë e kapur, nuk do të ketë liberalizim vizash për qytetarët e Kosovës.
“Vetëm brenda një dite, kuptojmë se Beqir Kalludra (gjyqtari që na dënoi për veprime politike dhe dënoi me mbi 21 vite burg aktivistët), liroi nga paraburgimi njeriun që dyshohet për krim organizuar e korrupsion, Azem Sylen ndërsa Nexhat Krasniqi, i dënuar me vendim të formës së prerë për keqpërdorim të detyrës zyrtare, rikthehet në postin drejtorit të prokurimit ne MTI. Përveç kësaj, para jo shumë kohe, Enver Hasani, për veprime korruptive u dënua me kusht dhe shumë raste të tjera të korrupsionit parashkruhen qëllimshëm! Kosova vazhdon të përballet me krim të organizuar e korrupsion dhe pershkaqenët e krimit amnistohen për veprimet e tyre korruptive. Me gjyqësinë e kapur, që terrorizon Vetëvendosjen dhe liron shkatërruesit e mirëqenies sonë, s’do të ketë liberalizim vizash!”, shkruan Haxhiu në Facebook.
Ndërsa Tinka Kurti, anëtare e Kryesisë së VV-së, njëherit zëdhënëse e kësaj partie, ironizon me sistemin e drejtësisë duke thënë se po e lufton korrupsionin.
“Pasi u luftu krejt korrupsioni u lirua dhe Azem Syla. Për liberalizim dy herë u dashka me dhënë tokë. TOKA e Azem Sylës dhe ajo e demarkacionit. Luftë, ama luftë e përkushtuar ndaj korrupsionit”, shkruan ajo në Facebook.
Hesht PDK-ja…
Përvec reagimeve nga vetëvendosësit, nuk ka pasur ende një reagim qoftë zyrtarë nga PDK-ja, ish-partia e Azem Sylës, por as edhe nga deputetë e zyrtarë të kësaj partie.
Reagim nuk ka pasur as nga Presidenca, kur kihet parasysh fakti se muaj më parë, këshilltari i presidentit Thaçi, Ismail Syla, mbrojti kushëririn e tij Azem Syla të cilit i thurri elozhe, ndërsa kritikoi mediat se janë të përkushtuara që ta shkatërrojnë “Dajën”.
Ish-deputeti Syla do mbrohet në liri dhe do gjykohet nga drejtësia vendore pasi EULEX-i javë më pare ua transferoi rastin.
Gjykimi do të udhëhiqet nga Beqir Kalludra i cili ishte gjyqtar edhe në rastin e aktivistëve të Lëvizjes Vetëvendosje, të cilët u dënuan me mbi 21 vjet burgim për rastin e sulmit ndaj objektit të Kuvendit të Kosovës, megjithatë këtë rast ka vendosur që ta kthejë në rigjykim Gjykata e Apelit
Kujtojmë se Gjykata Themelore në Prishtinë, në njoftimin e saj për lirimin e “Dajës” thotë se “ka analizuar ekzistimin e rrethanave të pengimit të rrjedhës së procedurës penale sa i përket të akuzuarit Azem Syla, dhe ka konstatuar faktin se nuk ka rrethana konkrete, që e bëjnë së paku të besueshëm faktin se të qenurit në liri të të akuzuarit, do e pengojë rrjedhën dhe zhvillimin e suksesshëm të kësaj procedure penale”. /tesheshi.com/
