Në radhitjen e Indeksit të lirisë së shtypit në botë në vitin 2017, Kosova ka shënuar një ngritje, por aty vlerësohet se, megjithatë ka probleme të dukshme.
Në ranglistën e sivjeme të këtij raporti, të publikuar sot nga organizata, “Reporterët pa Kufij”, Kosova është renditur e 82-ta, që paraqet kërcim për disa vende nga viti i kaluar, kur ajo radhitej në pozitën e 90.
Në kategorinë me probleme të dukshme gjenden edhe Bosnjë Hercegovina (në vendin e 65, vjet 68), Serbia (sivjet 66, vjet 59), Kroacia (74, vjet 63), Shqipëria (76, vjet 82) dhe Mali i Zi (106, vjet po ashtu 106).
Prej vendeve ballkanike në kategorinë më të ulët, në atë me situatë të vështirë në lirinë e shtypit, është Maqedonia, megjithqë është radhitur më mirë se vitin e kaluar. Maqedonia është në pozitën 111, ndërsa vjet ishte e 118-ta.
Në raportin e sivjetëm, janë pesë kategori: situatë e mirë, situatë e kënaqshme, probleme të dukshme, situatë e vështirë dhe situatë shumë serioze.
Në kategorinë situatë të mirë kryeson Norvegjia, e cila vjet ishte e treta, e pastaj radhiten Suedia, Finlandam Danimarka, Holanda, Kosta Rika, Zvicra, Xhamajka, Belgjika dhe Islanda. Këto janë shtetet që janë plasuar në 10 vendet e para. /tesheshi.com/
