Duke folur për stërzgjatjen e zgjidhjes së çështjes së mediave në grupet e punës, zv/kryetarja e LSDM-së, Radmilla Sheqerinska në emisionin “Ruga e Re” në TV Shenja, tha se problemi qëndron te VMRO-DPMNE-ja, pasi sipas saj, pushteti dëshiron kontroll absolut mbi mediat dhe kështu nuk u jep shanse qytetarëve që të informohen drejtë.
Sipas saj, sot Maqedonia është mes Taxhikistanit dhe Burkina Fasos në indeksin e lirisë së shprehjes në botë. Për këtë fajtor janë edhe Agjencioni i mediave që vazhdimisht ka heshtur për fyerjet që janë transmetuar në televizionet e kontrolluara nga pushteti.
“Kjo dëshmon se duhet agjencion i ri që do të tregojë pavarësi bazike, e që duhet të formohet në bashkëpunim me SHGM-në dhe Sindikatën e Gazetarëve”, tha Sheqerinska.
Më tej ajo akuzoi VMRO-DPMNE-në se bën lojë fëmijësh me Marrëveshjen e Përzhinos.
“VMRO-DPMNE bën lojë fëmijësh. Në fillim pranojnë të nënshkruajnë një marrëveshje, pastaj mundohen që të mos e realizojnë”, tha nënkryetarja e LSDM-së, Radmilla Sheqerinska.
Sipas Sheqerinskës, edhe BDI edhe PDSH, në takimin e grupeve të punës që u zhvilluan dje, kanë kërkuar që TVM2 të jetë vetëm në gjuhën shqipe dhe t’i ndryshohet emri.
Mediat janë çështja kryesore për të cilën VMRO vazhdimisht bën presion dhe sipas Sheqerinskës, përmes mediave partia e Gruevskit kontrollon gjithçka, duke filluar nga institucionet e deri te të gjithë.
Më tej deklaroi se deri më 20 shkurt kësaj çështjeje do t’i jepet zgjidhje. /tesheshi.com/
