Nga Bashkim Kastrati
Edhe pse liqeni i Batllavës dhe ai i Badovcit në Kosovë, kanë arritur nivelin maksimal të ujit, pasi që ka pasur reshje të shpeshta të shiut gjatë këtij viti, reduktimet në furnizim me ujë të pijshëm për qytetarët e Prishtinës po vazhdojnë.
Ylber Zabërgja, menaxher ekzekutiv i prodhimit në ujësjellësi regjional Prishtina, ka thënë për tesheshi.com se niveli i liqeneve është premtues dhe garanton një furnizim me kapacitete optimale për një periudhe një vjeçare edhe nëse nuk do të ketë fare të reshura atmosferike.
“Kuptohet niveli në liqenet akumulues të Batllavës dhe Badovcit varet ekskluzivisht nga të reshurat atmosferike. Mungesa e të reshurave dhe thatësira në vitin 2013 dhe fillimi i vitit 2014 ka qenë alarmante dhe kemi qenë në një situate vërtet shumë shqetësuese. Thatësia e madhe që ishte ndikoi që niveli i liqeneve të jetë afër minimumit ekologjik. Fati deshi dhe të reshurat e muajit prill 2014 mbushën liqenet akumulues. Tash dy vite më vonë jemi në një gjendje shumë të kënaqshme dhe premtuese”, thotë Zabërgja.
Aktualisht fabrika e Ujit ne Albanik (Batllava) punon me kapacitet maksimal 820 litra për sekondë, ndërsa fabrika e Ujit ne Badovc, punon me kapacitet maksimal 400 litra për sekondë.
Niveli në liqenin e Batllavës është 3,05 metra nën maksimumin e kapërderdhjes, kurse niveli në Liqenin e Badovcit është 2,95m nën maksimumin e kapërderdhjes.
Por përkundër kësaj, me mungesën e ujit qytetarët e shumë lagjeve të Prishtinës përballën që nga paslufta. Edhe pse ka pasur premtime të shumta sidomos gjatë fushatave zgjedhore se do të përmirësohet furnizimi, nuk është bërë asgjë konkrete në zgjidhjen e këtij problemi.
Ylber Zabërgja thotë se furnizimi me ujë për qytetarët e Prishtinës po bëhet sipas një plani të paraparë në muajin korrik të këtij viti, ndërsa aktualisht nuk ka kapacitet për furnizim 24 orë me ujë.
“Gjendja e furnizimit me ujë të pijes në qytetin e Prishtinës dhe në tërë zonën e furnizimit është stabile, duke u bazuar në orarin e reduktime të planifikuara, orar i aprovuar më 22 korrik 2015. Kuptohet kapacitete përpunuese na kufizojnë për një furnizim 24 orë në ditë”, thotë Zabërgja.
Ai thotë se së shpejti do të përgatitet një plan i ri i furnizimit në mënyrë që të evitohen sa të jetë e mundur reduktimet.
“Me rënien e temperaturave dhe ndaljen e keqpërdorimit të ujit të pijshëm për ujitje, Ujësjellësi KUR Prishtina do të hartojë së shpejti një plan furnizimi me një kohëzgjatje të furnizimit të konsumatorëve, në mënyrë që furnizimi të jetë më i mirë dhe të ketë sa më pak reduktime”, theksoi Zabërgja
Ja si është furnizimi aktual në lagjet e Prishtinës
Shumica e lagjeve të Prishtinës përballen me mungesë të ujit, ndërsa ujësjellësi është duke planifikuar që në fillim të vjeshtës ta ndryshojë orarin e reduktimeve, në mënyrë që të rritet furnizimi me ujë të pijshëm.
Lagja”Arbëria”, qendra e qytetit të Prishtinës, lagja Ulpiana, Dardania, Lakërishte, një pjesë e lagjes “Kalabria” dhe lagja Tophane, aktualisht furnizohen me ujë të pijshëm nga ora 05 e mëngjesit deri në 22 të mbrëmjes.
Lagja Kodra e Trimave, një pjesë e lagjes Arbëria furnizohen nga ora 3 e mëngjesit deri në ora 11 paradite, dhe nga ora 16 pasdite deri në ora 22. Pra pjesën më të madhe të ditës këto lagje kanë mungesë të ujit.
Zona Industriale, lagja Kalabria, Banimet kolektive në hyrje të Fushe Kosovës, furnizohen me ujë nga ora 06 deri në ora 21 në mbrëmje.
Lagja Bregu i Diellit, Aktashi III, Aktashi I,II, Zona Qendër, dhe Qendra Studentore, furnizohet nga ora 06 e mëngjesit e deri në ora 22 të mbrëmjes.
Banesat e Bardha, lagja e Velanisë, Mati I-II, një pjesë e Zllatarit, Tasligje ,Vneshtat, Kolevicë e re, Kolevevicë e Vjetër, Lagja prapa shkollës Normale, furnizohen nga ora 03 e mëngjesit deri në ora 10 të paradites, ndërsa pasdite, nga ora 16 deri në ora 22.
Lagja Ulpiana, një pjesë e Dardanisë, lagja e Universitetit, lagja e Spitalit, lagja e Muhaxhirëve, Dodona, Sofalia (e ndarë në dy zona, çdo dytën ditë bëhet furnizimi i zonës), lagjet në rrugën Haxhi Zeka, Taslixhe, një pjese e Veterrikut, furnizohen nga ora 05 deri në ora 11 paradite dhe pasdite prej orës 15 deri në ora 22 të mbrëmjes.
Por jo vetëm ky mbetet orari i vetëm i reduktimeve, pasi që prishjet e ndryshme kohë pas kohe në rrjetin e ujësjellësit, shkaktojnë reduktime të mëdha.
Në fillim të vitit 2017 pritet të eliminohen reduktimet
Qytetarëve ankohen për reduktime të ujit. Ata thonë se janë lodhur me këto reduktime, sidomos kur është koha për t’u pastruar dhe për nevoja tjera.
“Përveç reduktimeve të rregullta, shpesh ka ndërprerje që po thonë se po bëhen për shkak të prishjeve. Për të pirë, po e blejmë nuk është shumë problem, por problemi më i madh është për t’u pastruar, për t’i larë enët etj”, thotë Blerim Berisha, banues në lagjen “Bregu i Diellit”.
Ndërsa Agon Ismajli shpreson që ndërtimi i fabrikës të kryhet dhe të mos ketë fare reduktime, pasi që është nevojë elementare të kesh ujë.
“Kur po ka thatësi nuk po ka ujë, se po thonë ka ra niveli në liqen, kur po bie shumë shi prapë nuk po kemi ujë, se po thonë nuk kemi kapacitet për ta pastruar ujin. Veç me ble një rezervar që të kemi ujë gjatë gjithë kohës”, u shpreh ai.
Problemi i furnizimit të qytetarëve të Prishtinës dhe qyteteve përreth me ujë të pijshëm pritet të zgjidhet pas ndërtimit të fabrikës së ujit në fshatin Shkabaj.
Ylber Zabërgja thotë se ndërtimi i kësaj fabrike do ta zgjidhte këtë problem me të cilin tash e një kohë të gjatë po përballen qytetarët e Prishtinës.
“Problem i reduktimeve do të zgjidhet pas ndërtimit të fabrikës së ujit të pijes në Shkabaj, e cila sipas parashikimeve do të nisë të jetë në funksion në fillim të vitit 2017”, thotë Zabërgja.
Aktualisht në Kosovës rreth 60 për qind e popullatës furnizohen nga puset, burimet e bunarëve. Duke e pasur parasysh se vërshimet paraqesin gjendje të jashtëzakonshme ku mund të përkeqësohet edhe cilësia e ujit të papërpunuar nga të reshurat, dëmtohen sistemet e kanalizimit dhe kontaminohen puset, ku një pjesë e popullatës furnizohen me ujë të pijshëm. Kjo ndodh sidomos në stinët që jemi duke hyrë.
Bashkësia Evropiane, në bashkëpunim me institucionet e Kosovës, është duke u angazhuar dhe duke kontribuar që deri në vitin 2020, të mos mbetet asnjë vendbanim në Kosovë pa u furnizuar me ujë higjienik për pije. /tesheshi.com/
