Nominimi nga Donald Trump i senatorit të Alabamës, Jeff Sessions si Prokuror i Përgjithshëm – duke e bërë postin më të lartë gjyqësor të vendit dhe kreun e Departamentit të Drejtësisë, një detyrë të mbajtur nga një prej pasuesve nativistë të linjës më të ashpër – është një kujtesë e përhershme se fjalët e thëna në fushatën elektorale kanë kuptim, se politika nuk është një biznes shfaqjesh televizive dhe se qeveria e Amerikës merr vendime që rregullojnë ose shkatërrojnë jetët e njerëzve, i japin formë ekonomisë dhe vendosin norma në botë.
Në momentet e para pas zgjedhjes së Trump, kishte nga ata që sugjeruan se presidenti i zgjedhur nuk është realisht një ideolog dhe se mund të përfshijë njerëz të moderuar në administratën e tij e madje, vunë në dyshim edhe interesin e tij për të qeverisur. Nominimi i Sessions sugjeron se e gjitha kjo është thjesht një shprehje dëshire.
Senatori 69-vjeçar nga Alabama, një nga mbështetësit më të hershëm të Trump dhe këshilltar i ngushtë i tij nga bota e politikës profesioniste, do të ketë fuqi të mëdha për përforcimin e ligjeve të emigracionit.
Nëse konfirmohet nga senati, ai do të mbajë menjëherë në dorë fatin e e grupeve të tilla si 728 mijë emigrantëve që iu është dhënë e drejta për të qëndruar dhe jetuar në Amerikë nga presidenti Barak Obama, pasi u sollën në Amerikë kur ishin fëmijë.
Sessions, kritiku më i egër dhe i palëkundur në Senat si i emigracionit të paligjshëm, ashtu edhe atij të ligjshëm, ka kërkuar disa herë për të miratuar ligje që anulojnë skemën e Obamës. Së fundmi, ai u përpoq pa sukses të ndalonte administratën Obama nga zgjerimi i përfitimeve për emigrantët, që përfshinin numrat e sigurimit dhe lejet e punës.
Legjislacioni i propozuar prej tij do të kishte ndaluar përfituesit e skemës të rinovonin dokumentet, e që praktikisht do t’i kishte lënë ata pa mundësinë për të punuar dhe udhëtuar pa frikën e deportimit.
Janë 11 milionë emigrantë në Amerikë pa dokumentet e duhura ligjore, një numër kaq i madh saqë shumë nga kolegët e Sessions në Senat, nga të dyja partitë, besojnë se nuk mund të deportohen, e se organet e zbatimit të ligjit duhet të fokusohen vetëm tek ata që janë me shkelje të rënda ligjore dhe krime. Këta kolegë thonë se qeveria duhet të parashikojë rrugë ligjore legalizimi për të tjerët, por Sessions nuk bie dakord.
Ai e ka shpenzuar dekadën e fundit duke drejtuar opozitën në Senat kundër reformave të emigracionit, duke argumentuar se emigracioni i paligjshëm ul rrogat dhe merr vendet e punës nga amerikanët. Për emigracionin e ligjshëm ai është një skeptik i skemës H1-B që ndihmon kompanitë të rekrutojnë punonjës të specializuar nga jashtë si shkencëtarëa apo inxhinierë duke akuzuar shefat e mëdhenj të biznesit, qeverinë, e shtypin sikundër atë që e quan mjedisin kozmopolitan se tallen me akthin dhe nevojat e “amerikanëve të përditshëm”.
Në vitin 2009, Sessions e quajti Eric Holder, Prokurorin e Përgjithshëm në administratën Obama si shumë të butë në menaxhimin e terrorizmit, dhe e akuzoi atë se ndihmon armiqtë e Amerikës kur publikoi memot e kohës së Bushit për përdorimin e teknikave të ashpra të marrjes në pyetje. Në vitin 2011 ai shkroi në “The Washington Post” se Departamenti i Drejtësisë po bënte një gabim të rrezikshëm duke i trajtuar terroristët e dyshuar si kandidatë për përndjekje penale, me të njëjtat të drejta për të ruajtur heshtjen dhe për t’u përfaqësuar me avokat si çdo i dyshuar tjetër.
Në vend të kësaj, shkroi ai, CIA-s i duhej dhënë qasje tek personat e dyshuar të profilit të lartë për të marrë sa më shumë informacion. “Kjo administratë ka humbur sensin e realitetit që shërbimet sekrete e jo procedimi penal, është rruga e duhur që vendi ynë të mund të diktojë e të spastrojë komplotin e ardhshëm të Al-Kaedës”, shkroi ai.
Në vitin 2015 ai apeloi kolegët të bllokonin pasardhësen e Holder si Prokurore e Përgjithshme, Loretta Lynch, me pretendimin se ajo kishte mbrojtur ligjshmërinë e vendimeve ekzekutive të Obamës për emigracionin. Tani ai me gjasa do të jetë pasardhësi i Lynch.
Përgatiti: Juli Prifti – /tesheshi.com/
