Linda Guler është një shqiptare e martuar në Turqi. Ajo i përket kështu një komuniteti prej miliona shqiptarësh që ndër vite jetojnë në këtë vend. Së fundi, ajo është bërë protagoniste e hapjes së një radioje e cila u përgjigjet sentimenteve atdhetare të bashkombasve të saj. Dhe është e lumtur për këtë.
Radio “Zëri i shqiptarëve” në Turqi. Si ndodhi?
Malli për vendlindjen është i papërshkrueshëm! Ç’mallem duke dëgjuar këngët e bukura që ka kultura e jonë, e sidomos me ato këngët e gurbetit që na bëjnë të ndjehemi më afër vendlindjes duke kujtuar me malle ato vite që i kaluam në mëmëdhe. Pikërisht këtu lind idea të hapet një radio ku përmes valëve tona do t’i bëjmë gurbetqarët të jenë më afër vendlindjes.
Sa dëgjohet kjo frekuencë nga shqiptarët e Turqisë? Sa është mirëpritur?
Që në fillim kjo radio është pritur mjaft mirë dhe dëgjueshmëria është shumë e lartë. Më gëzon fakti se çdo ditë e më tepër vijnë urime për punën time dhe kjo më obligon të punoj edhe më tepër.
Cila është përmbajtja dhe lloji i këngëve më të dëgjuara për shqiptarët në Turqi?
Mundohemi që t’i prezantojmë të gjitha trevat dhe të gjitha zhanret e muzikës tonë nga arkivi shumë i pasur.
A vlerësoni se nëpërmjet kësaj radio në njëfarë forme e pengoni asimilimin eventual të shqiptarëve në Turqi dhe ruajtjen e vlerave kombëtare?
Shqiptarët në Turqi janë njerëz me virtyte të larta kombëtare dhe janë munduar gjatë gjithë kohës ta ruajnë identitetin, traditën dhe kulturën kombëtare. Por sigurisht që nëpërmjet një radioje si kjo dhe organizimeve tjera me karakter kombëtar, do të ndihmohet procesi i ruajtjes së vlerave tona.
Sa është e vështirë të mirëmbahet një radio në Turqi?
E lehtë nuk është fare sepse këtë e bëjmë në mënyrë vullnetare pa asnjë mbështetje financiare, vetëm e vetëm të dëgjohet zëri i shqiptarit anë e kënd botës.
Të kalojmë pak në jetën e juaj private. Që sa kohë jetoni në Turqi?
Unë dhe familja ime jemi me origjinë nga qyteti i Kumanovës së Maqedonisë, por unë jam e martuar në Turqi dhe nga marrëdhënia bashkëshortore kam dy fëmijë, një djalë dhe një vajzë.
Meqë përmendët se keni dy fëmijë, në çfarë gjuhe flasin fëmijët me prindërit në shtëpi?
Unë mundohem dhe gjithmonë bëj përpjekje që t’ju flas shqip në mënyrë që ta ruajmë gjuhën dhe ta trashëgojmë edhe në brezat tjera.
Cila është qasja e popullit turk ndaj shqiptarëve atje?
Jam shumë e lumtur që populli turk na do dhe na nderon pa masë. Këtë nuk ka nevojë ta them sepse edhe ata vet e kane dëshmuar në shumë raste kurdo që shqiptarët kanë pasur nevojë për ndihmën e tyre.
Dhe për në fund, cili është mesazhi juaj për mërgimtarët shqiptarë në përgjithësi?
Ta rruajmë kulturën traditën dhe mos ta harrojmë gjuhën tonë të bukur. “O gjuhë e bukur o moj gjuh amtare, o je e ambla o moj gjuhë shqiptare, o je e ambël o moj e kulluar o që kto troje o të përdoruan”.
Intervistoi: Mensur Krasniqi – /tesheshi.com/
