Kreu i NISMA-s në Kosovë, Fatmir Limaj, në vizitën që i ka bërë një fabrike të qumështit në Malishevë për një moment është zhveshur nga petku i politikanit duke bërë veterinerin, e gjithë për atë të shkretë votë. Dje nën armë me UCCK-në, ai sot ka hyrë në një shtalë të mbushur me krerë me lopë dhe më pas ka shikuar dhe nga afër se si përpunohet qumështi.
Limaj ju ka premtuar pronarëve të fabrikës përkrahje në mënyrë që të shtojnë numrin e të punësuarve.
“Sot në Malishevë vizitova edhe fabrikën për grumbullimin e qumështit. Edhe drejtuesit e saj shprehen shqetësimin që deri më sot nuk kanë marrë asnjë përkrahje nga institucionet qendrore të shtetit, ndryshe me një përkrahje të vogël do të mund të punësonin mbi 60 punëtorë të rinj. Mbështetja për bizneset e vogla dhe të mesme, mbështetja për bujqësinë do të jenë prioritetet kryesore të Nismës në qeverinë e ardhshme”, ka deklaruar Limaj.
Kreu i kësaj partie ka vizituar edhe një fabrikë për prodhimin e dritareve dhe dyerve të plastikës, po në Malishevë, ku ka parë nga afër se si punohet dhe me çfarë vështirësi ballafaqohen pronarët e saj. Këtë që ka ndërmarrë Limaj, në Shqipëri e praktikon Ilir Meta. Ky i fundit tregon interes për fronte prodhimi, sidomos agrikulture, duke shfaqur shqetësim e interes bashkë që punët të ecin mbroth. Dhe gjithccka për votën ditën e zgjedhjeve. /tesheshi.com/
