Tashmë ka fituar konture të qarta drafti i ri i rekrutimit dhe funksionimit të gjyqtarëve të gjykatave antikorrupsion, prokurorëve specialë të SPAK si dhe agjentëve të Byrosë Kombëtare të Hetimit, të gjitha pjesë e Reformës në Drejtësi.
Siç ka bërë të ditur tesheshi.com dy muaj më parë, ata do të kenë të njëjtin shtrat ligjor si dhe agjentët e FBI-së në SHBA, të cilët janë të kontrolluar nga të gjitha anët.
Në ligjin e fundit të ndryshuar nga ekspertët ndërkombëtarë, janë dhënë detaje mbi kontrollet dhe gjurmimet që do bëhen ndaj tyre. Në formularët e vetëdeklarimit që duhet të firmosë çdo person që do të emërohet në këto institucione të rëndësishme, prokurorët dhe gjyqtarët pranojnë që për 10 vitet e ardhshme, kur edhe do ushtrojnë këto detyra, të përdorin një numër telefoni celular dhe një adresë poste elektronike. Të gjitha këto mjete komunikimi dhe bisedat e tyre në to, do të mund të kontrollohen 24 orë në 24 nga Byroja Kombëtare e Hetimit.
Dhe për këtë do të nënshkruajnë vetë përmes formularëve. “Unë jam i informuar dhe jam dakord që për këto dhjetë vite do të marr një telefon celular, një numër celulari dhe një adresë poste elektronike. Jam dakord të përdor vetëm këto mjete komunikimi elektronik. Nëse gjatë një emergjence do të më duhet të përdor një mjet tjetër komunikimi elektronik, do t’ia raportoj këtë fakt Oficerit Përgjegjës të Byrosë Kombëtare të Hetimit brenda 3 ditësh. Jam i informuar dhe dakord që ky numër telefoni dhe kjo adresë poste elektronike i nënshtrohen vëzhgimit nga Byroja Kombëtare e Hetimit, ku përfshihet leximi i e-maileve, mesazheve tekst si dhe dëgjimi i bisedave”, thuhet në deklaratën që ata duhet të firmosin.
Kandidatët duhet gjithashtu të deklarojnë nëse kanë pasur takime, marrëdhënie ose kontakte të papërshtatshme me persona, të cilët kanë qenë ose janë të arrestuar, të dënuar, apo të akuzuar publikisht për përfshirje në krimin e organizuar.
Po ashtu, ata plotësojnë dhe një formular për pasurinë. Ata duhet të deklarojnë aty të gjithë llogaritë bankare të tyre dhe të familjarëve, si dhe çdo prona a pasuri edhe jashtë vendit. /tesheshi.com/
